要選特區政府頭號大忙人，以噚日嘅情況嚟睇，睇怕非保安局署理常任秘書長湯顯明莫屬。八方只見「甜糖」（湯之洋名TimTong嘅諧音）噚日好似濕水欖核咁，呢頭喺政府總部入面開會，嗰頭落樓下西閘收二十三條簽名，返到辦公室櫈都未坐暖，又要落樓走多轉。
以前佢成日俾反對派話佢大細超，噚日佢就自己落樓收民間人權陣線十九萬個反對立法簽名，收完重專登走去同司徒華握手，祝佢老人家聖誕快樂。華叔就認真老實，話甜糖面色嘛嘛，唞番一日半日好啲，甜糖亦遵命，話會唞番日先再睇意見書。
到下晝，支持立法保障國家安全大聯盟交六萬幾個簽名，去到西閘外面等到頸都長都唔見甜糖落嚟，佢真係公平喎，支持反對都要等，結果二十五分鐘之後，先跑到落去收簽名。
傳真︰2623-9278
電郵︰