由吳君如主演的電影《金雞》昨日上映，正式與今年聖誕檔期的《英雄》、《無間道》及《哈利波特消失的密室》等猛片正面交鋒。前晚吳君如在其電台節目中，與杜汶澤唱雙簧力數《英雄》的四宗罪，君如此舉涉及利益衝突，難免令人質疑。
吳君如與杜汶澤前晚在商台節目《嘩！嘩！嘩！打到嚟！》中，唱雙簧狂踩《英雄》一片，力數《英雄》四宗罪，包括章子怡角色可笑、特技太多、美術造作和歌頌秦王等。
由君如擔綱主演的電影《金雞》昨日上映，而其男友陳可辛更是此片的監製，至於另一主持杜汶澤除了在《無間道》中飾演「儍強」一角，又在《金雞》一片客串飾演舞女大班，兩人都在聖誕電影檔中爭一席位，其他電影早已鬥得異常燦爛，《英雄》、《無間道》、《哈利波特消失的密室》三片均票房甚佳，《金雞》昨日加入戰團，演員吳君如和杜汶澤前晚卻狂踩《英雄》，難免令人質疑其立場。
前晚在節目中，杜汶澤首先談起對《英雄》一片的感想說：「我起初抱好大期望，可以講演得最好嘅係陳道明（飾秦王），而李連杰、梁朝偉就係咁打、係咁打。」
吳君如亦接口暗踩章子怡說：「次次章子怡出嚟我就想笑，又嚟？！（指每次出場都追殺人）」杜汶澤聽後隨即笑道：「係咁打、係咁打，足足打咗成九十分鐘。睇完有幾樣嘢想講，的確呢套戲喺任何時候都咁靚，啲唔應該靚嘅都咁靚。」
吳君如亦大讚《英雄》的美術十分漂亮，但卻取笑片中的顏色運用不當，她笑說：「無可置疑係有漂亮包裝，但係唔知點解要用toneontone。有一場真係要笑一笑，佢用幾個唔同顏色去代表唔同人嘅角度講古仔，其中一場去到一個毛筆房，個tone係藍色，張曼玉同梁朝偉着嘅衫、書房嘅竹筒甚至連毛筆都係藍色，嗰場真係笑咗出嚟。」
二人並大彈戲中武打場面及特技過多，吳君如說：「我覺得特技唔使咁多。其實好多人將《英雄》同《臥虎藏龍》比，但《臥虎藏龍》打嘅時間真係好有戲，楊紫瓊同章子怡真刀真槍打，嗰場全部有晒戲，所以我覺得好好睇。所以點解甄子丹同李連杰打係好好睇，因為係最少特技，佢哋真係識打，而梁朝偉同章子怡係靠特技幫，嗰啲一嚟就特技，然後就漫天飛雪。」
其後杜汶澤又說：「呢部係好有政治立場嘅電影，一個為統一天下殺萬民同焚書坑儒嘅秦始皇好英雄，唔殺秦始皇嘅就更加英雄。關於秦始皇護國護民，導演可否解釋一下？當我讀得書少，唔好話讀到F5，就算係小學六年班，我睇小學社會書都有講秦始皇焚書坑儒係一個暴君嚟，殺咁多人點謂之護國護民呢？同埋我好感慨嘅係，中國電影係咪要拍到好美學同特技，先可以畀外國人睇呢？」
吳君如表示不太喜歡武打片，她說：「我睇完結局嗰場真係好政治化，但係始終都唔可以抹煞佢哋場面真係好好。但我自己本身其實唔係咁鍾意睇武打片，鍾意睇劇情片。」