原子鏸同鄧健泓雖然已經係圈中公開嘅一對，但唔知點解佢哋拍拖都要拍得咁避忌，好似前日咁，馮仁昭喺尖沙嘴海港城見到佢哋兩個行街街，於是走上前諗住打個招呼。點知話口未完佢哋即刻彈開，原子鏸重九秒九衝入一間舖頭度匿埋，搞到馮仁昭好似拆散鴛鴦，做咗千古罪人咁。
原子鏸撇低男朋友唔理，搞到鄧健泓一支公儍更更咁企喺商場度，馮仁昭問佢同女朋友係咪揀緊聖誕禮物，鄧健泓就笑笑口咁話：「行吓街啫！你哋影夠啦，唔好影啦！」其實原子鏸同鄧健泓已經俾人影過好多次相，但唔知點解佢哋兩個都重要咁避忌，唔通原子鏸見男友係歌星身份，怕男友班fans唔鍾意之外，重怕唱片公司唔鍾意佢哋公開戀情，所以先至拍得咁低調？
章小蕙噚日喺佢間時裝店話自己今年會一個人過聖誕，佢話：「我之前已經過咗二十幾年花蝴蝶生活嘅聖誕，今晚就會一個人寫稿，做個寂寞憂鬱嘅女作家。」章小蕙重話聖誕冇男士約會，佢話：「嗰個着五十四號Armani西裝嘅男人都走咗啦，有時真係好睇，未必好用㗎。」
李蘢怡（Tiffany）噚日去港台接受訪問時話早排去北京拍電視劇《人人都說我愛你》時有豔遇，佢同劇中一個男演員互相對對方有好感，對方早幾日打畀佢，Tiffany話：「佢打畀我話有日發夢見到我，喺夢入面同我一齊行街，重話好掛住我。雖然我對佢有好感，但作為女仔唔可以做主動。」
梁詠琪（GiGi）噚日平安夜連走兩場，先到旺角，然後再去荃灣同歌迷報佳音。GiGi喺旺角個活動度拖住隻五個月大嘅金毛尋回犬「陳金豬」，GiGi話：「因為我屋企五隻狗成日見報，為咗配合番我首歌《傷心尋回犬》，所以借咗蘭子隻『陳金豬』。」不過「陳金豬」唔知係咪覺得GiGi嘅歌聲太動人，竟然不時發出狗吠聲幫GiGi伴唱。另外，GiGi話已經同男友鄭伊健交換聖誕禮物，不過佢就唔肯透露係乜嘢，淨係話好實用嘅。
鍾鎮濤（阿B）同女友范姜及囡囡鍾嘉湄噚日喺台灣返香港過聖誕，佢哋一齊喺機場出閘，嘉湄重拎住一隻大熊公仔。問到嗰隻公仔係咪阿B送嘅，阿B話：「係范姜送嘅，我哋會一家人食飯慶祝過節，囝囝（鍾嘉浚）遲啲先返嚟。」問阿B有冇送禮物畀女友范姜，佢話：「唔使啦。」
噚日平安夜，上山詩鈉同寶貝女Hilary去金鐘太古廣場買聖誕禮物，佢話今年送咗兩對耳環畀個女，佢個女四歲嗰陣，靚靚（袁詠儀）已經帶佢去穿耳，Hilary細細個就好貪靚，一啲都唔怕痛。至於囡囡今年會唔會同王菲個女竇靖童開派對，上山詩鈉就話唔會喇！