聖誕節傳來好消息--恒生銀行名譽董事長利Sir利國偉前日經醫生批准，正式出院，可以同家人共度聖誕佳節。
利Sir出院，最開心嘅當然係利太，佢由利Sir今年初突然中風入院以嚟，日日陪伴左右。當時嘅情況比較嚴重，幸好瑪麗醫院嘅醫生同護理人員全力以赴，利Sir雖然年紀大，但康復進度驚人。
月初八方去醫院探佢老人家，先知佢對香港嘅近況非常清楚，每日都睇電視新聞，秘書重剪定報紙嘅重要章節，讀畀佢聽。
唔覺唔覺，利Sir喺瑪麗住咗接近一年，佢住院嗰陣當然好掛住屋企同恒生，佢可以落床後，仍需繼續接受物理治療，留院比較方便，但醫生開始批准佢放吓假返屋企。到呢個月初，佢老人家就喺家人陪同下，返恒生中環總部一趟，老夥計見到利Sir返去都十分高興。
利Sir同八方講，所有恒生嘅舊同事佢都認得，話睇住佢哋大喎。佢重叫八方得閒多的去恒生，唔係去存款，而係去食蛇。
（圖）利Sir今年初突然中風入院，利太日日陪住老公，𠵱家可以返屋企梗係開心啦。 資料圖片
傳真︰2623-9278
電郵︰