老董由年頭俾人鬧到年尾，幸好特首辦班馬仔對佢好忠心，噚日重喺辦公室開咗個聖誕Party開心吓，特首伉儷同林煥光都有去參加。
特首辦班老友向八方講，個Party其實好小圍，趁住食晏嗰陣舉行，所以並冇浪費公帑，老董雖然啲感冒已經好番，但係都冇發表偉論。大家重夾錢玩吓Bingo，聽講林煥光中咗獎，但係都攞番出嚟抽過，大家好開心玩咗一陣，反正呢個假期特首肯定冇假放，特首辦亦唔慌得閒。至於麥Sir今日就請班新聞主任食嘢，聚一聚。
今個聖誕，除咗老董要閉門造報告之外，中央政策組嘅劉兆佳博士最忙，呢炮係佢老哥嘅處女作，大家見佢平日口水多過茶，今次輪到佢表演都有啲期望，八方相信佳叔應該唔會太失禮嘅。
傳真︰2623-9278
電郵︰