馬場見到退休賓架L，講起道亨銀行高層替換一事，賓架L話呢啲事並非罕有，A銀行以高價收購B銀行之後，梗係A銀行啲高層話事啦，除非B銀行啲領導人係天才。不過道亨原高層以前有唔少認股權，以高價賣咗畀發展銀行，算係標咗尾會，人人都可以上岸，毋須同啲花旗援兵爭鋒。花旗兵重要搏殺搵退休金，道亨原高層已經印印腳。
花旗銀行認真巴閉，佢啲VP級人員，往往成為別家銀行嘅要員，最佳例子當然就係梁錦松過大通，又有戴維斯、王冬勝過渣打、黃鋼城過摩根再輾轉去咗DBS，現在統領DBS嘅香港業務；重有好多其他人散佈各銀行各部門。
花旗人才輩出，皆因年年請trainee，要求甚為嚴格，入到去訓練又多又好，成日要上堂，過咗十年八載，羽毛漸豐之後，就會俾獵頭族撬走。點解要走呢？因為花旗內部人才競爭激烈，新進人物既要向上爬，又要頂住不斷湧現嘅新人嘅挑戰，到咗四十歲左右，自不然想出去做，唔想再留響花旗拼命。梁錦松喺花旗二十幾年，乃屬異數，你試吓問佢：「松哥七三年啲同期trainee，有幾多個做咁耐呀？」答案就係所餘無幾。
以前左丁山曾經儍儍哋教老闆訓練新人，送舊人去上堂，去巴黎、紐約交換三個月，等佢哋吸收新知。老闆只講一句話：「佢哋會繼續幫我做咩？有乜保證？點解我要為他人作嫁衣裳？」呢種心態不除，華資公司永遠唔夠美國公司爭。