改裝車：
改裝奧迪A4性能賣相兼備

奧迪A4可稱得上係汽車設計嘅一大突破，除本身有出色嘅性能及操控性外，極具吸引力嘅造型亦係賣點之一；而今次呢兩部改裝A43.0Quattro及A4Avant1.8T，唔單止外觀有八成跟足同廠嘅RS版車系外，經過改動嘅機械結構，亦增強咗車子本身嘅性能表現，從而達至性能賣相兼備嘅效果呢！

記者、攝影：黃凱穎
車輛提供：TWAutosport（21420001）

全車包圍辣上辣
原有奧迪A4嘅造型經已十分吸引，但響大家眼前呢兩部A43.0Quattro及A4Avant1.8T型號，就加裝有一套Caractere全車包圍，當中包括車頭泵把、鬼面罩、車身兩側裙腳、車尾擾流器及高置尾定翼，再加上A43.0Quattro一套BBS18吋胎軨，同埋A4Avant1.8T旅行車，所配用嘅RS4Style18吋胎軨組合，望落可謂跑味十足。而車廂配搭則沒有作出太大改動，只係換裝上金屬跑車腳踏，可見A4原來嘅車廂布局，係幾咁吸引同實用呢！

改裝電腦夠實際
雖然引擎沒有多大改動，但改換上行車電腦後，扭力輸出就會增強不少，其中一台1.8Turbo引擎嘅低壓Turbo，喺高轉時所輸出嘅馬力亦有所增強；就連一台3.0V6偈嘅扭力輸出亦有所增強，起步加速亦予人強勁嘅反應呢！同時，A4Avant1.8T雖用上原裝Turbo，但為保護進氣系統嘅管道，就必須加裝一個放氣Valve。而用於此車上嘅Forge放氣Valve，與大家常見嘅好唔同，佢會發出一種低頻洩壓聲，並會連續放出，唔會一下子將壓力放盡，咁樣就可以解決因為收油後洩壓過量，而有「腳軟」嘅出現情況啦。

剛柔並重富操控感
另外，一套Supersprint排氣喉除能解決排氣系統需要好長時間才進入工作溫度，相對會產生大量水份嘅問題外，亦能令引擎呼吸變得暢順；另外，佢重用上鋁化鋼製造，而聲音更予人有跑車感覺，停止時無甚特別，但只要踩高一、兩千轉，嗰種來自引擎同尾鼓之間嘅排氣聲便會源源湧出。而一套KW可調校式懸掛系統，吸震能力亦見出色，唔單止畀到你有舒適嘅乘車環境外，喺行走不平坦嘅路面或當車速加快時，亦能有出色嘅貼地性能呢！

點解要改裝？
車主Michael（右）認為A4Avant1.8T嘅外形較普通，但加咗Carctere全車包圍後，賣相變得有型得多同好有跑車Feel。另外，改裝後嘅性能表現亦較前增強不少，無論起步加速，都予人有敏捷暢順嘅反應呢！