梁詠琪（GiGi）表示今個聖誕要在工作中度過，她先要出席多個公開活動，又要抽空與歌迷開派對，未能與家人及男友鄭伊健一起慶祝。而她心目中認為最浪漫的聖誕，是在結了冰的湖上溜冰。
梁詠琪在今年的聖誕節認真忙碌，除要出席多個公開活動，又抽空與歌迷唱卡拉OK開派對，未能與家人及男友鄭伊健慶祝。
不過GiGi向來孝順，早已經準備了禮物送給家人，她日前說：「送聖誕樹囉，每年都係我負責買嘅，而且喺屋企附近就有得買，好快啫！其實我諗佢哋最想我可以坐定定食個聖誕大餐，唔好走來走去就得，可惜今年都好難，但係我諗會趕得切返屋企，參加佢哋嘅party換禮物嗰個環節。」
至於男友鄭伊健，早前GiGi向傳媒透露仍未想到買甚麼給他，現在則欠時間，她說：「我太忙，最初諗住行到邊買到邊，但係實在冇時間行街，𠵱家重未買到呀！」
日忙夜忙的GiGi，不期望收到甚麼大禮物，反而希望可以一家人同度如童話故事中的白色聖誕，她說：「最緊要當日要凍，然後一家人喺結咗冰嘅湖面上溜冰，個天就落住雪，雖然天氣會好凍，但係覺得好浪漫。」
回想小孩時代的聖誕節，GiGi仍印象深刻，而縱使經常有人說這些佳節，女孩子最容易失身，GiGi則淡定地說：「梗係唔會啦！因為每年我都係跟住合唱團周圍唱詩歌，記得有年自己揸住蠟燭唱，重燒着咗企前一排嘅同學，𠵱家諗番都好好笑。」
採訪：王連連
攝影：陳志嵐
化妝：AndyLeung（HairCulture）
髮型：BluedyWong（HairCulture）
服裝：上衣（DaDa）裙（TheLostAndFound）
場地提供：小熊國