民政事務局局長何志平呢輪人氣急升，連二十三條都講埋一份，噚晚佢老哥又攞住個小提琴去出席聖誕老人愛心大行動2002籌款音樂會，為有學習障礙嘅小朋友籌款。
為咗保證唔會遲到，何局長重特別由中環坐天星小輪去尖沙嘴文化中心，費事塞車冇得預時間，事關尖沙嘴交通，呢排亂過亂世佳人。
何局長噚日同班行家午宴時，笑說同魯平媳婦姚珏，鋼琴家區美玲同埋男高音莫華倫同台演出，壓力好大，所以老婆胡慧中唔去捧場，因為唔想見到個老公出醜。局長又話，𠵱家個個局都要慳家，佢都諗緊將來啲場刊可能印少啲，唔使一人一份咁浪費，佢重話，唔好睇少呢條數，加埋加埋可以慳好多。
至於呢個假期，佢最想多啲時間陪屋企人。
（圖）何志平話老婆胡慧中唔去捧場，係怕會見到佢出醜喎。
傳真︰2623-9278
電郵︰