有沒有想過今年搞一個「蠔」華派對?!食物主角不再是行到無倫的燒火雞，而是即開即食滑嘟嘟的肥美生蠔。重可以一班朋友包場玩晒，無人可以騷擾你！最好就是全城至In地區，感受最熱鬧的聖誕氣氛。好彩我相識滿天下，識到「蠔霸」阿Jesse，今晚可放心交畀阿Jesse幫手安排個私人「蠔」華聖誕派對啦！
記者：陳冰麗
攝影：黃子偉、陳智良
原來Jesse本身在佐敦開牛扒屋，因為做到悶！想搞吓新意思，特別將自己最愛食的生蠔變成一門生意，開設OysterStation，昨日剛好是他開業一周年。經營呢間蠔吧可說是他的另一挑戰，因為這裏屬上環半山必列啫士街，是一條連接蘇豪區士丹頓街的倔頭巷，平日幾乎人迹罕至。
Jesse亦承認自己的舖頭細，老闆及夥計都是他，但他不介意一腳踢，更開心說：
「其實都有好處嘅，可以直接同客人溝通，慢慢由新客變熟客，熟客變好朋友，呢種長久嘅關係先至係生意之道。」
雖然說得很有道理，但見他招呼客人之餘，又要負責開蠔，又要入廚房準備，哪有時間同客人溝通呢？我都不期然為他擔心！不過嚟呢度有個好處，就係客人可以自攜靚酒前來而完全不收開瓶費，所以每次我與朋友到訪，必自備一支靚紅酒食蠔。
靈魂人物
徐國樑（Jesse）（中）：既是老闆，又是大廚。
GiGi（右）：Jesse女朋友，專責樓面工作。
阿棠（左）：GiGi細佬，客串幫手，主力執頭執尾。
講到食蠔，Jesse建議初哥大可以先試試澳洲的Tasmania，鮮甜夠肥美，帶海水味，比較容易入口。若然鍾意比較濃味一點的，則可以揀法國蠔王Belon0000，Belon分為一個零至四個零，四個零代表蠔夠重身，最肥美。我因為比較鍾意帶甜及Creamy的蠔種，Jesse就揀了PacificRock畀我試，果然無介紹錯，入口鮮甜味十足，我只係滴一、兩滴檸檬汁落去，一點也不覺腥。
這裏除有超過十多種蠔任選擇外，不可不試海膽，雖然是韓國進口貨，但即開即食的新鮮味道及滑嘟嘟口感，更勝日本貨！
有Jesse安排一切，今個聖誕節派對肯定餵得飽班朋友，因為還有其他食物，其中的椒鹽雞骨更是Jesse的精心傑作，女士尤其會覺得方便進食，食完所有再來個鮮蟹，包保大家滿足兼暖胃。
精選鮮蠔6款，其中包括Belo一款，另可自選任何價值$28至$30的鮮蠔，包括帶甜的Tasmaniaarea91、Creamy的PacificRock、有海藻及青瓜味的NetartsBay、帶甘又有濃郁海水味的Cumbrae等。牡丹蝦每人2隻；深海鮮螺、法國甜蜆分別4隻；赤貝2人一隻。
Jesse揀蠔秘技：殼緊閉要濕潤夠重身
還記得第一次食生蠔是在澳洲的魚市場，那種即開即食，既鮮甜又略帶少少鹹水味的鮮蠔，簡直令我一試難忘。今次Jesse令我想起在澳洲食蠔的感覺，同時亦教曉我食蠔，原來要知道蠔新鮮與否，最緊要留意個殼，若然個殼緊閉、夠濕潤，攞上手夠重身就算新鮮，而要知道蠔肉是否肥美，則要留意蠔殼窩位，愈深就愈肥美，還以為只要夠重身就可以，原來揀蠔也大有學問呢！
芋絲春卷，入口好香脆，啖啖有芋頭香，但一定要提提那碟椒鹽雞骨，將雞槌部份加工，令大家可以好方便咁攞住支雞骨食上面的炸雞肉，全賴Jesse細心地將每隻雞槌的雞骨抽出大半，令雞槌前半部的雞肉成為無骨狀態，然後再落鑊炸。
除汽水任飲外，（左起）鮮榨青檸梳打、柚子梳打及橙雜亦是任飲，講到喉乾聲沙飲杯柚子梳打最適合不過。
1.聖誕、除夕夜包場，最低消費$8,000，30人玩最抵，平均每位$267，有14種不同冷熱盤食物供應。
2.免加一，汽水任飲，抵！
3.4人即送2002年澳洲白酒一支，有28人的話，即有七支白酒分享。
4.可自攜酒類，免收開瓶費，又慳一筆。
OysterStation
地址：上環半山必列啫士街31號地下
電話：25490132
包場時間：7:00pm-12:00am
付款方法：現金或信用卡
地址：銅鑼灣耀華街16號
電話：28346232
包場費：最低消費$3,000
每位：$250-$300
人數：可容納8-25人
時間：6:30pm-12:00am
賣點：主打日式美食，包括魚生拼盤、炸帶子粟米餅、天婦羅豆腐鰻魚卷、龍蝦卷、櫻花卷、牛肉照燒、日式炭火串燒、蜆肉麫豉湯、精選甜品等等。
備註：酒水另計，可自備酒，收開瓶費，每支$100。
地址：銅鑼灣區（可先致電查詢詳細地址）
電話：28382684
包場費：最低消費$6,560
每位：$328
人數：可容納20人
賣點：主打法國Fusion菜，Sell環境，好有家的感覺，客廳一角放有梳化，可以玩飛行棋，180度維港景色。
備註：聖誕期間免收服務費。