港股噚日未有跟隨美股上升，全日反覆下跌57點，收報9570，成交30.73億元，相信今日半日市重更加靜。不過，噚日電盈（008）就大發神威，股價再升4.65%，收報1.35元，成交1.76億元。歐資行櫥窗粉飾之說，似乎所言非虛。
繼早前3間公司金禾（090）、富昌（916）及裕豐（965）被聯交所勒令停牌後，噚日又有大凌（211）被證監會停牌。黑客話，據聞有人因為不滿大凌一意孤行提出供股計劃，引致其他股東不滿，結果有股東去證監會投訴，並投訴大凌可能涉及帳目問題。相信今次事件非一時三刻可以解決，大家要有心理準備，股份可能有排都唔能夠復牌，而事件可能會拖累其他同大凌有密切關係嘅股份。
安徽海螺（914）噚日勁升8%，收報2.675元，全日見唔少中資買盤力托。Cookie話，聽聞公司可能進行重大收購，壯大水泥業務。
公司最近以2766萬元人民幣，增持上海海螺明珠水泥12.8%及寧波海螺水泥15%，股權分別增持至76.2%及75%，主要是公司睇好國內水泥需求強勁，市場經營環境轉好，才作出增持行動。
恒富（643）發出盈利預警後噚日復牌，股價急挫31%，收報0.60元。另一家安利控股（102）同樣發出盈利預警，不過股價則冇變，收報0.315元，其實因為冇成交。ｅ莉莎話，安利冇成交由於冇乜街貨，其實恒富街貨亦唔多，噚日沽壓唔算大，只屬乾跌。不過由於炒家財力一般，博反彈真係要諗過。
阿虎