測量界立法會議員劉炳章平日唔多講嘢，非常低調，近排卻牙痛咁聲，唔係因為生意或者政治問題，而真係牙痛。
劉炳章同八方講，佢幾年前剝咗大牙，當時牙醫已經警告佢可能會影響其他牙齒位置，佢因為事忙冇理。
直到今年驗牙，終於發覺大件事，就係上顎牙齒因為冇咗大牙頂住而移位，牙醫一睇之下，叫佢做個大手術，鑲幾支鈦金屬入牙床，再上螺絲裝兩隻假牙，由於過程涉及割肉鑽骨，太過血腥，八方都係唔形容落去。
但係劉炳章話荷包先係重傷地帶，原來呢次大牙手術，要成八萬蚊，即係四萬蚊一隻，認真「揦脷」。呢兩隻假牙重貴過金牙，怪唔得劉炳章牙痛咁聲啦！
劉炳章話其實一般牙醫，大概收二萬蚊一隻，不過佢為安全計，貴貴都寧願搵個名醫開刀。
劉炳章自己萬金一牙，佢太太就平民化得多，原來劉太幫襯開何俊仁細佬何俊龍睇牙，何俊龍做街坊生意，非常實惠。
講開何俊仁，原來佢幾兄弟個名都好威猛，大佬叫俊鵬，三弟叫俊駒，四弟就係俊龍，五弟叫俊麒，惟獨仁哥個名唔係動物或神獸，反而最特別。
傳真︰2623-9278
電郵︰