恒基大角嘴港灣豪庭，同東涌藍天海岸一樣，用劃一價促銷，四十七樓單位，都係賣一百四十三萬八，發展商又接受支票認購，重唔會過數，所以，短短幾日就有成千張票。
聽講恒基重有一樣秘密武器，就係高佣金嘞，有兩個半佣，即係做成一單交易，大概有三萬六蚊，代理肯定搏命拉客。
發展商肯收支票，即係個盤有得炒，咁啲代理就煩嘞，因為票量多少，會影響啲客抽到前籌嘅機會，代理行分分鐘要鬥入票，又要多花人力物力。
另外，恒基肯收支票，市傳因上環帝后華庭今個禮拜五至開始退票，鎖死大批資金，恒基只好變陣吸客。
中國國家建設部住宅產業化促進中心，同中國房地產報社，聯手搞咗個中國（廣東）「新新人家戶型設計精品獎」，長和系嘅珠海海怡灣畔二期海茵名苑同海天閣齊齊攞獎。
海茵名苑攞到「低層住宅類戶型設計精品」獎，樓盤嘅設計，喺珠海重係第一次見。主要係因應南方氣候條件而建，採用大開窗形、大陽台同雙露台，令單位有較佳通風同採光效果。
而九層高嘅海天閣，就攞到「普通商品住宅（多層）類戶型設計精品」獎，理由係物業戶戶向南、採光同隔音效果理想。
香港興業喺剛過去禮拜六同日，以劃一價促銷東涌藍天海岸，最後賣咗十一個，八十八萬嘅就賣咗四間。
利嘉閣話佢哋做咗三間劃一價單位，其中兩間係一百一十八萬，一間係一百六十八萬。
賣樓嗰兩日，最勁嘅相信係董事廖偉強，據講佢兩日都係由上晝十點留到夜晚十點，全程睇到實，重冇乜點食嘢㖭，真係鐵人。
由於利記喺東涌冇據點，最近嘅都要去到青衣，佢哋就將青衣分行做支援站，由外區帶客入去揀樓。
兩日成績統計，攞到兩成半市場佔有率，都算唔錯，所以遲啲會搞慶功宴食番餐。
新鴻基地產旗下嘅康業同啟勝管理公司，最近齊齊攞獎。康業攞咗香港生產力促進局嘅「2002香港服務業獎：生產力」大獎。呢個獎係以「促進生產力的領導方式」、「重視顧客」、「生產力管理及改善系統」同「業績」四項作為評選準則。
康業董事及總經理鄺正煒話，公司運用多重監察制度，同透過內部良性競爭嚟提高生產力。
另外，啟勝就喺屋邨組攞到房委會「最佳物業管理公司」獎項。
今日係平安夜，但又未出糧，點好呢？美聯物業好識做，已提早一個禮拜出糧畀夥計，等佢哋慶祝佳節時可以鬆啲手，又可以刺激消費，促進香港經濟。
中原地產就話冇提早出今個月嘅糧畀夥計，但就話下個月會有雙糧出，而且事先張揚，話明年唔會減人工，今時今日，呢個簡直係天大喜訊。至於花紅，今年中已經出咗嘞。
美記喺呢方面就唔及中記好。據聞冇減薪裁員嘅消息，但雙糧重未有聲氣。聽講佢哋就算有花紅，都係喺農曆新年前至出畀夥計嘅。
發展商近排時興同有名氣嘅家具店合作，為買家提供家具優惠。早排就有前亞姐羅麗莎同擎天半島搞裝修套餐。最近全力催谷畢架山一號嘅長實，就搵咗藝人鍾楚紅老公朱家鼎開設嘅NuConcepts家具店，為買家提供貼身家具訂做同配襯。
NuConcepts負責人話，會放置名牌家具喺示範單位，客人睇啱可以預訂，有幾多折扣，要慢慢傾啦。
長實郭子威話，個盤地段矜貴，估計賣晒可套現五十億。既然係貴價盤，三個示範單位同售樓處都落重本，用成五千萬去裝修，下個月初有得睇。
蘭西
電郵地址：