前英格蘭國腳中場「肥仔嘜」加斯居尼好波就係人都知，但因為佢嘅態度問題，搞到上季尾之後，到𠵱家都未落到班。不過，佢最近痛定思痛，向外放風話自己閉關苦練後瘦咗又弗咗，希望可以再踢番波。
三十五歲嘅加斯居尼話：「我𠵱家嘅狀態係我三年以嚟最好嘅，我好掛住足球，希望可以有班落，最好就係英超聯或者英甲聯球隊㖭。雲拿保斯係我契爺，如果佢叫我去列斯幫手，我一定答應佢。」
對於加斯居尼咁積極，我求大俠都好欣慰，不過就多口奉勸佢一句唔好心頭咁高；𠵱家呢個市道，好多後生過佢嘅球員都落唔到班，好似前曼聯球星沙柏就話喺冰島一條漁村嘅球隊踢波。重有就係雲拿保斯𠵱家連自己都顧唔掂，又點有能力帶挈佢呀！「肥仔嘜」不如好似我哋嘅「范大將軍」范志毅咁，考慮吓踢英乙聯啦！
日本前鋒高原直泰以十萬歐元（約七十八萬港元）加盟德甲球隊漢堡，間接令中國球員俾人笑，因早輪中國邵佳一亦到德甲嘅慕尼黑1860試腳，但邵佳一效力嘅國安要求一百萬歐元轉會費，1860就話：「呢個價係日本足球先生嘅十倍，邵佳一係邊個咁巴閉？」究竟係高原個價太過平，抑或球會國安獅子開大口呢？你哋自己定奪啦！
早輪我求大俠咪話過布力般領隊桑拿士嗰招使得，喺季中羅致咗愛將土耳其前鋒蘇古，等在陣嘅前鋒更加肉緊個正選位，點知蘇古連一場波都未踢過，就話係上個禮拜五練波斷腳，快則要唞八星期，慢則提早收咧，須知道蘇古同布力般簽嘅係短約，到季尾就滿，真係唔知係蘇古黑仔定係桑拿士黑啲！
朗尼喺禮拜日對利物浦如果唔係射中楣，睇怕又做咗愛華頓嘅英雄。但話時話，呢個小朋友雖然好波，不過球品就唔多好；事關喺謝拉特雙腳踩中佢隊友尼史密夫後，表面就上前勸交，實際就過去抽水。朗尼早排出席BBC嘅頒獎典禮時，經已俾人彈佢態度唔好，睇嚟愛華頓領隊莫耶斯同佢父母真係要好好教吓佢。
NBA小馬隊三位主將奴域斯基，芬尼及尼殊，近日透過傳媒催促老細古賓，希望佢盡快落實教練尼爾遜嘅執教合約，呢三位球員重將球隊嘅成功歸於尼爾遜，話唔想俾「外人」介入咁話。教練同球員咁融洽，唔怪之得小馬今年啲戰績突然上到嘭嘭聲，重話有力挑戰公牛七十二勝紀錄㖭！
逢周一至周五見報