港股冇跟美股上升，偏軟收市，恒指唔見57點，高低波幅有限，大隻嘢中電盈（008）最養眼，再升6仙，收1.35元。窩輪龍虎榜同上周五差唔多，電盈Call輪霸咗5個頭位，升幅由19%至47%。
電盈Call輪升得最勁嘅係9417，收4.4仙，有400球易手，金額超過1千6百萬銀，排第2，僅次於1隻恒指Call輪。9417明年5月夠鐘，溢價36.6%，槓桿率30.7倍，因為屬於細價仙輪，槓桿率又勁，撞啱正股波動，輪價直頭飛沙走石，睇吓下邊個圖就知，上月初到月底，升幅4倍幾，跟住1個月內急瀉8成，再跟住過去兩日低位回升又係漲1倍。炒呢件飛沙走石Call輪，須知所進退，直情同賭博冇分別。電盈5合1就快生效，估計喺1.40元有阻力。炒高溢價輪切忌坐盤坐得太耐。
死火輪榜排頭位嘅係滙豐Call輪9395，收2.7仙，唔見嗰橛大過剩番嗰橛，跌幅68%。滙豐（005）收86.75元，跌75仙，市場擔心明年初收購美國Household成功，發行新股，新股掟出街。9395大概重有4日交易，行使價88.50元，滙豐幾日內升唔夠1.75元以上，隻輪就係咁先，係咁先嘅機會好大。
章盛