上周五美股杜指回升146點，但對昨日港股未帶來利好刺激，恒指高開12點後即時回落，全日大部份時間在9560至9600區域窄幅上落，最後收9570，跌57點，成交只有30.73億元。
市場瀰漫一片假日氣氛，唔少外資基金經理已提早放聖誕假，睇嚟今年餘下兩個半交易日，港股好難出現戲劇性走勢，回升至去年12月31日收市11397水平。恒指將連續3年下跌，是1969年以來首次。趙飛雲唔算好迷信，但董特首上任後，第一個新年的大年初二花車遊行，香港「明天會更好」的花車出現車毀人亡的意外後，香港一直未好過。
過去5年股市，除特區政府98年入市，促成99年牛市外，其餘4年皆低於去年收市，96年恒指收市價13451、97年10722、98年10048、99年16962、00年15095、01年11397及02年估計低於11397（現時9570）。董建華尚有4年多任期，希望佢轉運，香港亦轉運。
香港99年曾出現轉機，可惜「八萬五」發揮威力，明天會更好成為泡影，特區政府今年終於認錯，改為催谷樓市，而經濟亦有見底迹象，為2003年帶來希望，可惜又因「23條」令社會分化，再度浮現危機，以往高調「穩定壓到一切」的政策似乎不見了。
97年亞洲鄰國出現金融危機，特區政府仍推出「八萬五」是自毀長城，引來大鱷攻擊。壓抑樓市泡沫並無錯，只是時機不當，當時香港底子厚捱過，如今「23條」若處理不當，只怕港股再出現「萬里長空」的日子。
趙飛雲