又到總結一年嘅時候，城大語言資訊科學研究中心依見報率，計算出今年「新聞人物」排名榜。香港藝人今年頻頻出事，不出所料，見報率最高嘅新聞人物就係謝霆鋒，佢前女友張栢芝排第三，𠵱家又坐番正嘅女友王菲就排第七。
十大之中嘅藝人，重有劉德華同剛過身嘅羅文，好彩其餘五位係政治人物，否則人哋以為香港冇晒文化只有娛樂。特首排第六，竟然輸畀排第五嘅台灣總統陳水扁；而財爺梁錦松就俾中共新任總書記胡錦濤踢出十大；國家主席江澤民亦輸咗畀王菲。
睇番台灣、北京，同上海嘅排名榜，發覺只有香港十大裏面先至有藝人，台灣同北京嘅十大清一色係政治人物；上海又有啲唔同，到美國打NBA嘅姚明，竟然見報率高過江澤民，王治郅同國足前教練米路天奴域都入十大。
傳真︰2623-9278
電郵︰