今晚就係平安夜嘞，等我大口羅拉同一大班日本藝能界紅人，同各位講聲MerryX'mas先！喺聖誕節呢個搵錢旺季，各位人氣藝人又點會停落嚟放假過節吖，佢哋梗係趁機出碟開concert𢱑真銀啦！不過佳節當前，佢哋又有乜嘢願望呢？聖誕節又會令佢哋勾起乜嘢回憶？
松浦亞彌話其實佢嘅初戀同聖誕都好有關，佢話：「幼稚園嗰陣有個男仔好受女仔歡迎，喺聖誕節時我同佢一齊表演之後，都對佢有啲好感，最後我同我眾多嘅情敵，用猜包剪囗嘅方法解決！」
Morning娘紅咗咁多年，一班成員都話出席各大小聖誕騷，已經成為佢哋過節嘅重要活動！今年聖誕節Morning娘重要宣傳兩套新片《MiniMoniTheMovie糖果大冒險》同《狗仔Dun物語》，不過佢哋話有fans陪冇honey都唔驚會lonely喎！
同松浦亞彌同門如敵國嘅藤本美貴，今年過節就傳統得多，雖然年尾佢要準備「紅白歌唱大賽」，但都會抽時間慶祝，佢話最好就可以同屋企人，舒舒服服咁坐喺熱氈上面食火鍋，一齊歡度佳節喎！
現年十八歲嘅性感新人長澤奈央，近幾年聖誕節都俾事務所當廉價勞工咁，派去唔同嘅地方出席function，所以佢話今年好希望可以同鍾意嘅人去迪士尼玩吓，可惜𠵱家重未有心上人！好在長澤奈央fans下個月幫佢搞咗個生日會，叫做有啲安慰咁啦！
上年都話好想返韓國過年嘅BoA，慨歎今年更加冇可能，因為佢要準備首次出席「紅白歌唱大賽」喎。今年試過幾次因為操勞過度入院嘅BoA妹，雖然啱啱攞咗好多個韓國音樂大獎，有名又有利，但係小心財多身子弱喎！