梅艷芳（阿梅）早幾年因為錢銀問題同梅媽媽有拗撬，但前日冬至，馮仁昭就見到阿梅返梅媽媽跑馬地屋企食飯做節，食到夜晚十一點幾，阿梅先至由助手陪同離開，事實證明，阿梅始終都係孝順梅媽媽，大時大節一定陪媽咪。
另外，阿梅噚日着住ChristianDior贊助嘅五萬幾蚊靚衫，出席下晝喺尖沙嘴洲際酒店嘅「梅艷芳極夢幻演唱會珍藏版CD?VCD?DVD發布會」，重宣布出年十一月再舉行個唱，預計開十五場，各大電子傳媒同唱片公司高層都有嚟撐場，而新人蕭正楠就扮聖誕老人送咗一頂皇冠畀阿梅，搞到阿梅不知幾咁開心。
噚日阿梅戴咗條萬幾蚊嘅旺財黃晶手鏈，但就唔見有旺桃花嘅水晶，阿梅一聽到即刻耍手擰頭話：「唔使啦，免麻煩，冇重好，我𠵱家好忙，根本冇時間拍拖。」
余文樂噚日去荃灣出席活動，個樣鬱鬱寡歡咁，原來佢重係為着納粹軍服影寫真一事而困擾，佢話：「好困擾，着軍服呢件事太敏感，我係最前線嘅人，係要承擔。」問余文樂會唔會唔敢再着軍服，佢話：「唔會，下次會小心啲。」
電影就有梁朝偉套《英雄》打佢另一套戲《無間道》，而電視就有張衞健打張衞健，喺無綫播嘅《齊天大聖孫悟空》，上個禮拜收視有三十一點（約二百萬觀眾），但係比起再上個禮拜，就跌咗兩點。而健仔喺同一時段，亦有喺亞視出現。亞視外購咗部張衞健做嘅《神探方天謬》，上個禮拜播，諗住張衞健打張衞健會掂，點知都係計錯數，只係
李蘢怡噚日出席喺荃灣廣場嘅「新城勁爆歌曲拉票大檢閱」活動。李蘢怡噚日話拍劇集《飛虎雄師》嘅時候，俾一個男人鬧，佢話：「當時試位，我就扮抄牌，點知就有個四、五十歲嘅男人走埋嚟鬧我，乜我老乜，話我成日抄抄抄。之後工作人員就話畀佢聽我哋拍劇，佢先走。嗰吓佢真係想『打動』我，我阿媽啱啱去咗日本，有事點算呀。」
吳君如日前接受新城《娛樂一早》訪問，透露原來當初拍攝《金雞》時，因為拍咗好多錢，所以男友陳可辛曾經想過搵有票房保證嘅鄭秀文（Sammi）做女主角。不過，吳君如就話陳可辛冇即時話呢個消息畀自己知，免得君如唔開心，反而等拍到尾聲時才將呢件事話畀君如知。君如承認若果真係換角，佢都唔知會唔會影響佢同陳可辛嘅感情。
陳煒噚日以騎馬將軍造型喺亞視總台宣傳新劇《太平天國》，唔知係唔係因為陳煒充滿女人味，所以隻馬一見到陳煒即刻流晒口水，重好似嘔晒白泡咁，不過陳煒就笑住話：「唔係，佢係因為食咗糖先嘔白泡啫。」而今個聖誕節陳煒會同家人度過，冇得過二人世界。