今日平安夜只得半日市，估計冇乜散戶會買賣，經紀行亦唔慌多人返工，睇嚟今日個市都係乏善足陳。講真句，如果小初做炒家嘅話，亦唔會喺今日郁手，容乜易買到成手貨脫唔到身。
當然，小初亦唔排除有人堅持繼續做嘢，好似新萬泰（433）早排失驚無神由0.11元炒上0.18元後，連續靜咗好多日，但噚日又突然發力，大升14.7％，收0.195元，為近期新高，成交金額重有成千萬元咁多。
經紀陳話，傳聞新萬泰可能印公仔紙收購上海地產項目。至於呢啲普通料，點解當係利好消息炒？經紀陳就話唔多清楚，反正炒家明顯係有水到，否則點可以將股價炒上。
至於隻股現價重跟唔跟得過，經紀陳就話兩睇，如果小初夠膽又錢多嘅話，短炒亦無妨。不過唔好忘記今日得半日市，跟住又放聖誕節長假，假如今日走唔切，搞到假期都心掛掛，千祈唔好賴佢喎。
慕容小初