今年九月港府為慶祝回歸五周年發行咗紫藍色花斑新款十蚊鈔票,人稱「花蟹」,據聞設計圖案係由財爺阿松親自批准,重話係佢上台後嘅得意之作,點知呢隻「花蟹」出到國際舞台卻成為笑柄。
星洲出版嘅《聯合早報》噚日有個專欄作者話,最近喺一個聚會上,有香港友人攞出一張香港「花蟹」畀大家觀賞,全席嘩然,話呢張嘢邊似係一個國際金融中心設計出嚟嘅紙幣?「像彩票還差不多,人民幣都比它好看!」
作者喺文章又趁機揶揄香港一番,話香港本來係華人世界中品味最精緻、帶領潮流嘅都會,但今時唔同往日,東方之珠嘅光芒已經俾「長三角」同「珠三角」蓋過,而當政者𠵱家卻因為二十三條、公務員減薪等事情忙到焦頭爛額,整個社會你鬧我、我鬧你。作者話,如果佢係香港人,感受唔知會係點。唔知老董睇到篇文,會面紅定係面黃呢?
傳真︰2623-9278
電郵︰