東涌藍天海岸開賣後，下一個大型住宅新盤要明年至登場，呢排發展商冇乜大搞作，主力係促銷貨尾，記者會都少咗好多。但長實就例外，今日又再嚟兩個記招。
第一個喺上晝開，公布長沙灣泓景臺第6座加推詳情，同埋講吓同道亨合作提供嘅新優惠付款法。
第二個喺下晝舉行，主題係就快開賣嘅畢架山一號，同NuConcepts合作提供家具配襯服務，介紹埋精選大師級家具系列。
長實一日搞兩個活動，地點都喺中環，等記者唔使咁頻撲，而兩個記者會之間嘅空檔，會喺蘭桂芳同傳媒一齊慶祝聖誕，認真周到。
長實上次一日搞兩個記招係今個月13號，咁啱嗰日又係講呢兩個盤嘅資料。
蘭西上個月講過，聖誕節期間，和黃會喺紅磡黃埔商場搞戶外激光表演，噚日就上演咗第一場，吸引唔少市民前去參觀，場面墟冚。
呢個「黃埔新天地之魔幻動感（激光）聖誕嘉年華」，係將黃埔號船身變成一個成千方呎嘅屏幕，播放幾千幅由電腦動畫繪製嘅插圖，造成好似一齣卡通片嘅效果。
大家覺得點呢？若果想睇，重有24至26號幾晚，晚上六點半到七點。以第一日嘅情況，可收到吸引人流嘅效果。
𠵱家去新樓盤參觀，除咗有得食、有得玩、有免費車坐之外，重有好多嘢睇。講緊嘅唔係現場表演，而係發展商安排駐場派禮物搞氣氛嘅花瓶女郎，由以前信和嘅美女陣，到近期擎天半島嘅外國模特兒，都令人眼前一亮。而日前搞內購嘅藍天海岸，亦安排幾個青春無敵嘅聖誕女郎，喺現場大派糖果。天文台話，聖誕節氣溫會跌至十度左右，睇怕過多幾日，大家都見唔到着住小背心同短裙嘅聖誕女郎。
九龍倉喺聖誕節同新年期間，為尖沙嘴擎天半島賣樓同參觀搞搞氣氛，除每個周末例牌嘅抽獎外，重特設5日雙人酒店連機票嘅寰宇旅遊大賞，分別係15號、25號同30號抽獎。率先喺15號中獎嘅買家阮氏夫婦，得到法國巴黎旅遊獎，價值兩萬幾蚊。佢哋買咗1座低層C室，噚日九龍倉就舉行咗個簡單頒獎儀式。至於其餘兩個稍後抽出嘅大獎係去倫敦同悉尼。
至於上個禮拜蘭西提到擎天半島抽獎由九龍倉員工攞到一事，九龍倉黃光耀（圖四右）講，啲細獎就畀所有人參加抽獎，咁做係等大家都開心啲，令到現場氣氛好啲。但佢強調，若果係大獎嘅話，就會唔畀員工同代理參加。以免減低睇示範單位或者買樓人士中獎機會。
美聯物業鄧天勇話，佢哋最近幾好環境，做咗單火炭半山伯爵堡，同大埔滌濤山董事屋嘅交易，夾埋收到80萬佣金，佢猛話要多謝九龍同港島區同事，點解？因為何文田區同事帶客過嚟先做到單伯爵堡，而港島跑馬地區就帶挈做到單滌濤山。
𠵱家做代理，唔可以好似以前咁單打獨鬥，要同外區合作，互相射客，咁至可以大家搵到食，亦壯大公司。
蘭西
電郵地址：