上周五美股上升，對今朝港股會有啲刺激。港股若然高開，高價追Call輪並唔化算，因住升勢唔能持續，個別股份若然高開好多，如果要賭嘅話，反為應該趁低揸啲Put輪，例如滙豐（005）如果上到88.50元，則買些少滙豐Put輪9578或9333，買入價可以訂喺45仙同36.5仙，即上周五收市價嘅9折左右。
過多5個交易日，就踏入新嘅月份。每逢轉月份，炒輪就要小心啲，因為心理上啲輪嘅壽命就會短咗1個月，譬如有3個月命變為剩番兩個月，短期輪尤其影響大，例如兩個月壽命嘅會變為下個月夠鐘。所以好多時每逢臨近月尾，正股上升，相關Call輪唔升，正股牛皮，相關Call輪則下跌，呢啲咁嘅情況，就係反映窩輪就快到期，時間值下降，溢價冇法子唔收縮。
新地（016）上周五升20仙，但啲敏感嘅Call輪唔一定跟正股，例如9525就係。9525同9524未來走勢會好波動，就算睇好正股而買入，都要即炒即食，咪揸得太耐，3月初到期，扣埋假期，有得買賣嘅日子唔係好多，兩隻輪行使價52.50元至53元，正股如升唔夠1成，兩隻輪都會全部冇得剩。新地今朝若高開好多，咪買Call輪，可以諗吓Put輪9529。
章盛