呢排街市啲雞頻患禽流感，政府總部亦有唔少高官染病，佢哋患上咗適時適候、想病就病嘅「愛國病」，呢個病喺社會為二十三條而嚴重分化時發作，令到推廣二十三條嘅悍將可以暫避鋒頭。
「病人一號」非保安局局長葉劉淑儀莫屬，佢之前瞓身推廣二十三條，不時一人舌戰數十至數百人，呢排咁多人開口支持二十三條偏偏唔見佢。新聞秘書話佢原來感冒咗好多日都唔好，夠膽「顛覆」葉太身體，呢隻菌都好勇！
「病人二號」就係律政司司長梁愛詩，佢噚日原本應承咗親台團體「中山學會」出席二十三條論壇，點知前晚又話病咗要易角。至於特首董建華同政務司司長曾蔭權，亦都話病咗。
硬銷二十三條嘅悍將一一病倒，剩低保安局署理常任秘書長湯顯明一夫當關，繼續講力撐。官場形容佢係繼房屋及規劃地政局局長孫明揚後，另一傑出嘅「老油條」，專帶人「遊花園」；加上佢個樣夠悶，所以由佢出嚟講二十三條，冇人有心機駁佢，火花自然大減。
愛國病唔使醫，只要過咗平安夜就會不藥而愈，唔係聖誕老人妙手回春，而係二十三條諮詢期明日屆滿，之後可以繼續硬銷二十三條，當然乜病都好番。
傳真︰2623-9278
電郵︰