有番咁上下紅嘅藝人，當然有自己嘅私家保母車啦，佢哋換衫食飯打機瞓覺，差啲連去廁所都會喺車入面解決！呢啲咁私人嘅地方，相信fans都會好有興趣見識吓，睇睇究竟自己個偶像住喺大屋定狗竇，今次我羅拉就搵嚟仲根霞、伊東美 同深田恭子嘅保母車畀大家開眼界。
仲根霞外表好斯文，原來佢架保母車亂到好似走難咁，衫褲鞋襪衣架周圍飛，簡直令fans「另眼相看」，好在霞妹冇連「內膽」都掛出嚟咋！佢話車入面乜衫都有，即時要變成高貴look定扮casual都冇有怕喎！
至於二十歲女都依然好鍾意玩具同靚嘢嘅深田恭子，保母車入面其實都幾簡單，最緊要有齊化妝品、雜誌、Discman同玩具，等佢拍戲等埋位嗰陣有足夠嘢畀佢消遣，寬唔寬敞反而係次要，橫掂佢邊度都瞓得着嘛！各位亦不難留意到恭子好多嘢都係粉紅色，梗係啦，佢出咗名係粉紅癡嚟吖嘛！
而伊東美 就比較搵笨，淨係肯騷佢拍廣告嗰架七人車畀大家睇，佢話自己用開嗰部都唔會差好遠，冇乜雜物，不過至冧佢嘅係張櫈可以拉低變成一張床，等佢隨時可以瞓覺喎！