自中國加入WTO後，大家都認為佢快將成為世界工廠，變成全球主要製造業集中地；好多國外車廠都表示有意將中國生產線，作為外銷品種嘅製造基地，而第一間將有如此動作嘅車廠，將會係日本嘅本田汽車。
本田現時響廣州已有合資公司，跟廣州汽車合作，以各佔五成股權嘅形式，喺廣州投資生產Accord及Odyssey車系；而Accord響國內更有供不應求嘅情況出現，可稱得上係最受歡迎嘅中檔房車。
最近，本田再同廣州及東風汽車合作，投資1億9千3百萬元建造新廠房，生產專供出口嘅本田車種，而主要市場則係歐洲及亞洲。新廠房預計於2004年下半年投入生產，初步估計年產量達五萬部，並以1.0至1.5公升車種為主；以現時嘅車種系列排算，極可能係生產Jazz；而國內早已有傳言話，本田將會於廣州投產三箱式嘅Jazz，並會以一台1.5公升引擎作動力核心。新公司組成比例係本田佔65%、廣州汽車佔25%，而東風汽車則佔10%，兼且稱得上係首條以出口為主嘅國產汽車生產線㖭！
文：陳自齊