小初睇見呢排假帳風波愈搞愈大，諗住細價股短期內都冇運行，點知多炒家消息嘅靚女經紀話，睇實建發國際（223）有着數。
靚女話，建發剛剛公布，以2875萬元收購一項工商指南使用權及顧問服務。至於呢兩個項目點解咁貴，靚女就話唔知，只知道呢單交易唔係全部用現金，大部份以發行新股支付，佔已擴大股本9%咁多。
據聞有投資者唔多happy呢單交易，所以隻股上周五復牌，股價一度插落至最低0.98元，但抽回1.09元收市，只係微跌1.8%。靚女話，睇到有人將股價頂番上去，就知道隻股應該有人護航，所以唔使理單交易正唔正，只要知道有水到要炒就夠。
小初則有所保留，建發原本生意相當扎實，吸引到唔少芬佬捧場，但公司今年4月用2300萬元現金，收購一家話會為建發建造一個網上展覽平台嘅公司，已令投資者唔多高興，今次又進行一單外間唔易明白嘅收購，如果因此失去芬佬支持，就未免有點可惜。
慕容小初