蘋果波經雖然貼中咗前晚巴塞隆拿贏馬略卡嗰場西甲聯，不過我求大俠就睇得有啲唔高興，因為馬略卡嘅喀麥隆前鋒伊圖實在太唔爭氣，特登攞紅牌，搞到馬略卡九個打十一個，唔輸有鬼！
有睇過嗰場波嘅球迷都知道，馬略卡嘅盧禾喺二十三分鐘被逐，「涉案」嘅巴塞隆拿球員莫達的確有扮嘢成份，但你伊圖都唔使咁躁，三番四次搵莫達報復，結果喺三十一分鐘做埋「紅牌阿姑」，而馬略卡就輸○比四。
其實，馬略卡喺對拉科魯尼亞嘅聯賽，都試過有伊巴加沙被逐，結果都打和二比二，所以伊圖只要沉得住氣，專心踢波，馬略卡未必輸實，但係佢選擇用最愚蠢方式宣洩不滿，累到球隊輸波，自己亦隨時停三場，認真不智。
所謂「見過鬼都怕黑」，中國足協為免新任教練阿里漢（呢個係中國足協官方譯名，前譯海恩）好似上手教練米路天奴域咁，淨係掛住「走穴」（即捐窿捐罅）拍廣告而忽略咗隊波，講到明如果冇佢哋准許，阿里漢就唔可以拍廣告；而就算佢哋批准，阿里漢都要交出一半酬勞。咁樣睇嚟，阿里漢喺未來三年可以叠埋心水教好班國足，唔使旨意做兼職嘞。
我諗冇球迷唔記得喺世界盃南韓對意大利執法嘅摩蘭奴。呢位仁兄真出位，下個月會喺意大利國家電視台節目參與演出，又唱歌又跳舞。電視台發言人講得最妙：「我哋希望搵一個反派角色，喺意大利人心目中有邊個乞人憎得過佢？」最搞嘢係摩蘭奴肯演出，難怪前國際球證柏列圖話：「佢一直想博出位嘅企圖，𠵱家總算現晒形。」
意大利足球暴力已經一發不可收拾，唔止輸波搞事，連贏波都搞事！話說意乙卡坦尼亞喺禮拜六贏特拉納後，會方准許五十個球迷入更衣室同球員一齊慶祝；據講，喺比賽射入兩球既奧利華拉因拒絕將件波衫送畀球迷，俾人拳打腳踢。事後奧拉華拉同埋隊友龍門伊素都話球迷行為離譜，要求離隊。嘩，贏波功臣都比自己球迷打，真係前所未聞。
近排問題多多飽受唔少傳媒抨擊嘅NBA球隊拓荒者，前日喺贏勇士嗰場波又有新「搞作」，就係同對方嘅球員動粗，結果威爾斯俾聯盟罰停賽兩場，佢嘅隊友華萊士就罰款萬五蚊美金。我求大俠好明白比賽呢家嘢碰碰撞撞梗有㗎，但既然自己嘅球隊已經咁多風風雨雨，有時真係要收斂吓，唔好畀球會個形象差落去。
逢周一至周五見報