鄭中基大前晚出席《行運超人》煞科宴後，與工作人員及數名CATGirl到銅鑼灣唱K消遣。昨日一位自稱當晚在場的Tiffany致電本報報料，指鄭中基提議轉場到尖沙嘴Cyber8Disco，當時鄭中基更向她們抽水，但她們最不忿卻是要自掏腰包埋單。
鄭中基大前晚出席完在黃埔海逸酒店舉行的《行運超人》煞科宴後，與王合喜及一班工作人員到銅鑼灣皇室堡唱卡啦OK，至三點多離去時，鄭中基與數名友人步出，旁邊還有三名有線CATGirl黃美妍（May）、張碧珊（Tiffany）及夏詩韻（Maggie）。
昨日一名自稱是當晚有份與鄭中基唱K的CATGirlTiffany致電本報報料，表示當晚唱K後，Ronald提議轉到尖沙嘴Cyber8Disco繼續消遣，但自己卻提早離場，未有埋單找數，最後要她自掏腰包四千多元找數，故她要將事件公開以洩心頭之憤。Tiffany說：「嗰晚鄭中基提議轉場，我哋同安雅成班都話好，我哋重安排秘密通道畀佢入。點知佢唔埋單就走，四千幾蚊要我哋找數，佢又食又拎好過份。」
問Tiffany何謂「又食又拎」，她說：「我哋出嚟玩，俾人抽吓水都預咗，當時有成五、六個CATGirl喺度，佢個個都摸勻，又摸胸又攬住我哋影相，又話去佢屋企重好玩喎，之後call佢又唔覆機。」她續說：「我哋問佢開支酒好唔好，佢話好，咁係咪應該佢畀錢呀？」她又謂之前拍《行運超人》識鄭中基，但並不相熟，不過當晚卻玩得相當投契。
鄭中基昨日在電話中得悉有人爆料表現相當愕然，他說：「嗰晚唔係我話轉場㗎喎，係葉念琛（電影編劇）同我講轉場，我車佢落去，坐咗十幾分鐘見攰就走先，我唔知邊個找數喎。」至於被指向CATGirl抽水，鄭中基說：「有冇搞錯，我邊有抽人水呀？合照就有，唔通大家話影相唔影呀？如果係我應該畀錢，我點會唔畀？如果硬係要我畀錢，佢話四千幾蚊咪畀佢囉。」問鄭中基會否懷疑是被人利用博宣傳？他說：「我點知呀？人哋做乜我控制唔到㗎喎。」
葉念琛昨日亦在電話中說：「嗰晚太多人，我都唔知邊個話轉場，我同鄭中基落去都冇預計逗留太耐，佢成晚同我坐，我見唔到佢抽人水喎。」
Tiffany經理人黃斯麟昨日在電話中承認Tiffany與另外兩位CATGirl阿May及Maggie，當晚確曾與鄭中基到Cyber8繼續消遣，但就否認Tiffany有打電話向傳媒報料。
黃斯麟又聲稱三位CATGirl未有被鄭中基抽水，他又說：「據我所知，嗰晚其實係成班《行運超人》工作人員去玩，Tiffany、阿May同Maggie都有份拍呢部戲，鄭中基同佢助手去到Cyber8一陣就行開咗。但我唔排除有其他人俾抽水而唔忿氣。」
本報昨日致電Tiffany，其聲線與報料自稱是Tiffany的人有分別，Tiffany否認有致電報料，她說：「嗰晚我都係早走，我冇找過數喎，我都冇俾人抽水喎。」若Tiffany所言屬實，不排除有當晚在場的CATGirl假冒Tiffany報料。