馬主N電召左丁山到馬場捧場，以為佢有份嘅馬有半冷位置機會，點知竟然跑第尾，輸到眼眨眨，好彩事先不敢寄予太大期望，冇輸到入肉，但係有啲運仔噃，輸完想話鬆人之際，碰到邵公子，佢話隻「盈嘉快車」贏得，不妨下注多少，彌補之前嘅損失。哈，邵公子真係財神兼貴人，六倍Win手到拿來，條氣順番晒。
離場之時，碰到退休賓架L，於是又講幾句，賓架L話最近又有老友提早退休，就係道亨銀行嘅中國業務主管王潮生，已經去咗放假，不再視事咯。
賓架L話新加坡發展銀行收購道亨之後，現在開始全面人手調動，換領導班子，喺香港主席黃鋼城主持下，前花旗銀行嘅要員慢慢掌握晒一切營運大權。黃主席亦係花旗出身，自不然對花旗訓練嘅產品有信心，啲舊人王潮生退休，董事梁建熙不再打理信貸（credit），改為做管理（Administration），譚炳勝之上有一位WalterCheung，原廣安老總韓泰元已經辭職，會去三藩市。
發展銀行乃新加坡國營銀行，國企嘅作風與香港嘅商業銀行嘅作風、文化，當然完全唔同，新老闆要改組，融合道亨、廣安，乃意料中事，由發展銀行控制嘅銀行好快會好似中銀香港咁，待立法會通過合併法案後，全部合而為一，大概明年三月以後可以成事。完全合併後，相信人事重組嘅步伐會更加快速。