全港最大型嘅AsiaGameShow終於開鑼，由於有大量新Game試玩及靚靚ShowGirl任影，成功吸引眾多機迷蒲頭。大會公布首日入場人次達到二萬人，到聖誕假期人數更會大幅上升，預計總入場人次達到十萬人，雖不及東京遊戲展嘅二十多萬人，不過對香港嚟講成績已算不俗，加上展期去到12月26日，機迷記住參考我哋嘅着數全攻略，趁聖誕假去熱鬧一下。
記者、攝影：徐影龍 鳴謝：SCE
逢星期一至五刊出
中文化Game可算係今次AsiaGameShow熱門話題，除咗已推出嘅《骰子熱爆》、《阿格斯戰士》、《魔戒：雙城奇謀》等外，機迷重首次玩到已完全中文化嘅戀愛Game《MemoryOff》。
精明嘅機迷，入到場唔會掛住影靚女或試玩新Game，而係睇吓邊度有着數嘢。最重手首選PS2個展館，即場免費派發PS2福袋，入面有襟章、原子筆、新GameDVD、卡拉OK現金券等。本來福袋重包一個精美年曆，不過由於大受歡迎，群情洶湧到推倒展館木板牆，基於安全理由惟有抽起年曆。
地點：香港灣仔會展新翼Hall1B~C
時間：即日起至12月25日上午10時至晚上8時
12月26日上午10時至晚上7時
入場費：$25
不過講到震撼，點都唔及世嘉王牌Game之一嘅《櫻花大戰：熱血潮》有得試玩。雖然《熱血潮》為首集《櫻花大戰》嘅Remake版，不過首度登陸PS2，令3D戰鬥畫面大幅強化，比SS及DC時期好得多，筆者就聽到唔少路過嘅機迷都講：「真係好靚喎！」據SCE負責人Akio所講，《熱血潮》隻金碟係開Show當日早上新鮮熱辣由日本運到，不論是否Fans都值得一試。可惜《TOD2》重未有任何中文化嘅新消息，希望趕得及出年三月推出。
除中文化Game外，現場重有好多未出街嘅新Game供試玩，包括《ArmoredCores：SilentLine》、《ThisIsFootball》、《V-RALLY3》、《一級方程式賽車》等，排隊試玩嘅人龍亦特別長，機迷始終都鍾意試新嘢。
GameShow當然唔少得一班名人到場壓陣助興，首先有代言人Sammi現身，大談製作全CGMTV《神奇女俠》嘅感受，佢總結咗一句：「成個過程都覺得好電腦，同其他MTV好唔同！」可惜由於Sammi抱病在身，現身十分鐘就匆匆忙忙離開。
日本Game界有猛人到場，包括《櫻花大戰》同《忍》嘅製作人大場規勝，以及《TOD2》監製吉積信，大談製作經驗同中文化新Game嘅進度，佢哋都不約而同認為中文Game市場潛力龐大，好有發展空間。最搞笑係筆者問到吉積信製作《TOD2》中文版嘅困難，佢話：「就係我唔識中文！」
睇GameShow除咗三五知己或一家大細，少不免有好多情侶拍住拖去，筆者就搜括到幾個適合一對對小情人留連嘅蒲點：