三T成員「龍嫂」鄭希怡（Yumiko）前晚喺中環Queen'sDisco，幫西門子2128夜光手提電話宣傳，又同現場fans玩遊戲。
點知大會司儀少爺占見現場有位男fans個樣有啲似成龍個仔陳祖明，即刻諗都唔諗就大大聲咁話：「佢咁似成龍個仔嘅！」Yumiko同成龍嘅緋聞傳得㷫烚烚，少爺占咁搞法，Yumiko唔尷尬就奇啦！
馮仁昭問Yumiko覺得男fans同成龍個仔似唔似？Yumiko耍手擰頭話：「都唔係咁似啫。」
講開成龍，原來佢前日喺台灣同台北市長馬英九一齊，為失明歌手蕭煌奇新碟造勢，今次係蕭煌奇推出第一張創作專輯《你是我的眼》，聽講場面都好感人。
此外，Yumiko噚日下晝喺旺角加州紅卡拉OK搞簽名會，送出二百五十張印咗佢個樣嘅聖誕卡畀fans，聽講fans前晚九點已經去到霸頭位，真係瘋狂。
九人組合Cookies噚日去灣仔會展，為其推出嘅寫真集舉行簽名會，吸引咗二百個fans捧場。余文樂寫真集因着咗納粹軍服而引起軒然風波，而Cookies喺佢哋本寫真集度就着校服同護士服，問佢哋擔唔擔心惹來非議？Cookies隊長Stephy話：「我哋係有着制服影相，但就冇收過任何投訴喎！」
張可頤噚日喺旺角一間卡拉OK同四十多個影迷聚會，可頤男友兼經理人陳容森亦有到現場為女友打點一切，佢話自己係女友背後嘅男人。可頤對於有咁多影迷支持，眼濕濕咁話：「我好多謝佢哋，九八年佢哋開始幫我成立張可頤國際影迷會，今次有好多人喺好遠嘅地方返嚟參加呢個聚會，我真係好感動。」
影帝黃秋生日前接受港台節目訪問，講到自己童年時一次盜竊後改邪歸正嘅經過，佢話：「有次同朋友偷嘢，佢唔敢落手，終於要我落手，最後佢俾人發現咗，但係最終走甩咗。我個人就係咁，真係做時就會做。嗰次決定無論乜嘢理由，唔啱嘅嘢就唔可以再做，嗰次之後我開始諗自己應該走乜嘢路。」訪問中秋生又點名大讚陳奕迅、陳冠希、余文樂同容祖兒呢班新一代演員，話佢哋各有潛質同好努力㖭！