余文樂穿上納粹軍服拍寫真，引來德國駐港領事館及猶太人團體強烈譴責，昨日余文樂表示寫真只是想以電影手法宣揚反戰訊息，並對今次誤會作出公開道歉。
余文樂在近日推出的寫真集《ProjectxShawnYue》內，穿上納粹軍服，扮演一名作為實驗對象的德國士兵，最後更變成巨人打敗德軍。未料這本寫真推出後卻惹來德國駐港領事館及猶太人團體譴責，指題材帶侮辱及煽動成份。
昨日阿樂在灣仔金紫荊廣場出席「動感熱舞嘉年華」活動時，強調絕非有意引起誤會，並為此事公開道歉。
阿樂說：「其實我之前試咗好多唔同嘅軍服，最後選中德軍係覺得造型靚，我哋嘅原意係宣揚反戰爭嘅訊息，寫真係用電影嘅手法表達，冇用文字交代，可能因為咁引起大家誤會，每個人睇嘢嘅觀點同角度唔同，着其他國家軍服都可能會引起同樣問題。」
問到阿樂會否向有關團體作出解釋？他說：「我自己好抱歉，有投訴嘅話，我哋會跟進番，我唔擔心呢件事影響自己嘅安全，因為大家都係理智嘅，呢啲冇得諗。如果因為我嘅過失導致唔開心，我道歉。」
去年趙薇因穿上日本軍旗服裝拍照遭譴責，在湖南登台時更慘被淋糞洩憤，未知阿樂會否擔心步趙薇後塵遭報復？他對此說：「冇諗過呢樣嘢，總之引起兩邊唔開心，我覺得唔好意思。」阿樂所屬之藝能經理人公司發言人林小姐表示若寫真再版的話，會考慮在照片上加上文字。
此外，阿樂前度女友盧巧音昨日在紅磡出席活動時，對阿樂着納粹軍服闖禍一事回應道：「着衫都要諗一諗先，最重要係啱場合，關於政治要小心啲，盡量冇乜爭議，作為年輕偶像，應該小心呢啲事。」
採訪：駱華齡 攝影：仇志德