西班牙組合「茄汁三姊妹」一首茄汁歌《TheKetchupSong》橫掃歐澳No.1音樂排行榜，香港立即有反應，不但開始有人試跳茄汁舞、酒吧舉行比舞大會，黃埔新天地更以它作為聖誕活動的主打，出動一千平方呎空中螢幕、激光和一班水晶宮蝦兵蟹將，為的就是做一台茄汁舞Show，教大家跳新興舞步！
記者：李玉蘭
攝影：林栢鈞 部份相片由被訪者提供
跳舞老師Mannix睇住個MTV，一陣已經學會，然後即場教人跳，「呢隻舞嘅動作好簡單，基本上四、五歲細路仔都做到。加上基本舞步只有四招，比起ParaPara、Macarena容易得多，跳出嚟又有拉丁舞嘅熱情奔放，能夠發揮一個人嘅性感味道，應該好啱𠵱家咁強調自我個性嘅後生仔女！但係呢隻舞好快，要跳得好，一定要feel真佢嘅節奏，至可以發揮自己嘅神髓，可以話易學難精！想憑佢出位，都要下啲苦功！」
曾經學過HipHop嘅Harley大概用咗個零鐘已經掌握舞步，就膽粗粗上台表演，「音樂好輕鬆，好容易記得，又好夾呢啲咁『悠』嘅舞步，係咁抹係咁搖吓就OK，比我過去玩過嘅任何一種舞都容易，估計佢會比ParaPara流行，因為無咁多嘢要記！」大學生Vivian：「我最鍾意一路印腳，一路抹枱嘅動作，好好玩！而且大部份動作都要擰腰擰Hip，全部都要有力，我覺得重可以用嚟KeepFit！」學跳Jazz嘅阿Ray：「佢好簡單，但係就令我覺得好自由奔放。」其實，高難度嘅Hip-hop都興咗咁耐，或者係時候興啲人人啱玩嘅新嘢喇！
西班牙「茄汁三姊妹」LasKetchup2002年Hit歌《TheKetchupSong》一出爐就橫掃英法愛爾蘭等歐洲十七國及澳洲No.1寶座，連帶佢哋MTV跳嘅舞，都受人追捧！喺香港重有唔同途徑畀你大顯身手。
●屋企網上學：登入
●出街跟人學：12月24-26日6:30-7:00pm、12月25-26日3:00-4:00pm黃埔號側有水晶宮成班大公仔喺街頭教你即學即跳。（查詢：21287710）
●滿師比舞擂台：12月24日ClubReact（尖沙嘴堪富利士道12號地庫，查詢：27238280）入場費：男$250，女$220。12月31日Cyber8（尖沙嘴彌敦道118號地下，查詢：23666722）入場費：男$300，女$250
●在Cyber8勝出者可得到SonyMusic歌星試音合約！