去新店試食是貪新鮮，去老店吃飯，就係貪唔使用腦，叫兩味招牌菜已經食得開心又放心。雖然身為中上環老街坊，但卻未親嘗過蓮香樓的點心和靚茶，只在中秋時節吃過那裏最耍家的蓮蓉月餅，實在慚愧。今次一訪，發現鎮店之寶並非甚麼撚手菜式，而是店裏的總廚顧問，龍甜先生。
人稱龍爺的龍師傅，雖已年近百歲，但講嘢仍然精靈，問他這道江太史會五蛇從何學來，他說：「清朝嗰陣有個叫江蝦嘅太史，佢中咗狀元之後就成日去食蛇，後來重叻到教人煮蛇羹，嗰陣我喺金城酒樓打工，個老闆就帶我去見佢學整，江太史會五蛇就係咁學番嚟。」同清朝狀元學整蛇羹？唔通龍爺屋企收埋個叮噹時光機？
禁不住問龍爺貴庚，誰知他搞笑地說：「我幾多歲？哎唷，我都唔記得喎，不如畀個身份證你睇啦！」一望才知面前的龍爺已九十有一，再問他何時拜會江太史，他說：「都六十幾年前啦，佢都應該係『拉士』嗰個狀元嚟囉！」如果想過個暖笠笠冬至，這碗正宗的太史蛇羹，相信會是首選。
望上去和平日食到的蛇羹有點不同，龍爺說他們的蛇羹唔落色，亦冇豆粉，用最靚的陳皮、老薑、木耳加五蛇炮製，吃時記得加點菊花瓣，可令蛇羹更加香。
這個懷舊菜現在並不常見，焗魚腸端上來已香氣四溢，龍爺說魚腸必要選用鯪魚或大魚的，先在缽底放油炸鬼墊底，然後放上洗乾淨的魚腸雞肫，再用雞蛋蓋過，放入焗爐焗數分鐘即可。
龍爺當年自創的菜式之一，早年在鑽石酒樓賣個滿堂紅，現已成了蓮香樓的鎮店招牌菜。先將鴨骨拆出來，然後再將鴨肉和冬菇、陳皮、湘蓮、鹹蛋黃和薏米等煮好塞回鴨肚內，再用老抽上色炸至金黃後，淋上芡汁，香脆惹味。
食客黃先生：以前喺呢頭做嘢，今日行開呢頭就嚟食嘢。最鍾意食呢度嘅燒肉。
黃太：平時好少嚟，最欣賞呢度嘅茶盅沖茶，特別好飲！
地址：中環威靈頓街160-164號
電話：25444556
營業時間：上午6時至晚上11時
如果閣下屬於大家庭，大時大節食飯都有成圍的話，今晚做冬就可能要揀間大件夾抵食的食店。在筲箕灣東大街多年的權發，都可算是街坊飯堂，好多住在附近的街坊索性夜晚唔煮飯，因為大大碟餸夠晒經濟實惠。
有沒有吃過沙拉骨？將沙拉醬配蝦球又試過未？炸過蝦球搭上了沙拉醬的效果，當然是惹味醒胃，不過為減少肥膩感，所以以西蘭花襯底中和。
古法燜斑尾現在已經很少食店曉做，黎師傅話古法即是要用冬菇絲、肉絲、薑絲和蒜頭等燜魚。石斑只挑魚身至尾部份，魚炸後撈起，然後將配料爆香加入上湯，再將魚以慢火燜。這樣吃石斑，倒還是第一次。
牛腩先和八角及香茅等配料一齊煮，然後將放下燜好的蘿蔔在鑊底，再將原煲牛腩倒下上碟，上碟時用爐架加熱，蘿蔔盡收牛腩精華，夠晒入味。
小食客吳偉程：姨姨成日帶我嚟，我最鍾意食呢度嘅蒜香雞、蒸蝦，差唔多一星期嚟一次。
曹太：呢度嘅廣州街頭蒸河粉好好食，啲餸夠晒大碟，好多時都食唔晒要打包拎走。
地址：筲箕灣東大街113號1樓
電話：25601003
營業時間：上午11時半至午夜12時
唔想用腦諗食乜，不如叫個冬至套餐。這套餐足四至五位用，有脆皮炸子雞、生炒青斑球、窩貼明蝦、揚州炒飯及合桃露，最抵食就係有原盅雞燉翅。
地址：北角渣華道62-68號地下及1樓
電話：25784898
營業時間：上午9時至下午3時，晚上6時至11時。
做節去大牌檔肯定夠熱鬧。新南苑的酥炸釀鯪魚（$48）向來受街坊歡迎，因師傅會先將鯪魚脊骨及魚肉去掉，將魚肉加配料打成膠，再釀回魚身，食魚不用𦧲骨。
地址：觀塘仁愛圍6-8及19-23號地下
電話：21913192
營業時間：下午5時至凌晨3時
功德林的素菜糅合了上海菜的名字，感覺實在幾可亂真，不得不吃的是素鵝，外形力求神似，吃落亦皮脆肉嫩，$55一碟。
地址：銅鑼灣怡和街31號樂聲大廈B座地下
電話：28903127
營業時間：上午11時至晚上11時
食燒鵝當然要去鏞記，皮脆肉香，醬汁惹味。雖然食店已有六十年歷史，但侍應招呼依然體貼，不會因名氣大而待慢客人。燒鵝每隻$320。
地址：中環威靈頓街32-40號
電話：25221624
營業時間：上午11時至晚上11時半
神燈出名食懷舊菜，油浸烏魚亦是招牌菜之一，說穿了即是炸烏魚，食落味道香脆，另可選擇鹽水或古法蒸。每両$9。
地址：旺角上海街419-421號
電話：23842840
營業時間：下午5時至凌晨2時
食客家菜出名的泉章居，其實也有粵菜吃，叫人又愛又恨的招牌梅菜扣肉（$50）更是不可不吃之選。
地址：銅鑼灣波斯富街110號
電話：25773833
營業時間：上午11時至午夜12時
食完飯，囉囉攣，原來爭碗糖水，最好食番碗滋潤紅蓮燉雪蛤（$30），加埋寓意團圓的湯丸，食完才感覺圓滿。
地址：九龍城龍崗道9號地下
電話：23833026
營業時間：中午12時半至深夜