喺嚟緊1月初響美國底特律舉行嘅北美國際車展上，德國寶馬車廠除會展出配用SMG波箱嘅Facelifted新版3系Coupe及開篷跑車等車款外，同場一部全新xActivity概念車，相信亦會成為眾人焦點。xActivity不但擁有極富肌肉感嘅車身線條，特製嘅車身結構更可為你帶來一個可完全打開嘅車頂配搭，好有揸開篷車嗰種暢快感覺㗎！不如今日就趁住車展未開幕前，一齊嚟先睹為快啦！
記者：郭信強
車廂布局方面，與造型一樣來得吸引之餘，而且重帶有濃厚嘅CyberFeel；另外，由於廠方為其用上較長軸距設計，所以車廂空間會來得寬敞闊落。而座椅嘅物料亦屬新設計，能因應座上乘客嘅重量，而自行調節承托度，較傳統電動或手動調校來得更方便，就連提存行李時亦有一套全新系統輔助，從而為你帶來不少方便呢！
從廠方所公布嘅資料中得知，呢部xActivity概念車將會以一台3.0公升直6偈（馬力231匹）作為動力來源，配合一套手動波箱（會否有自動波配搭，仍有待廠方公布），從而可有更出色嘅性能表現。同時，廠方更為其加入一套四驅系統，以及前輪245/45R18、後輪275/40R18嘅輪胎組合，路面循迹性之高重予人有莫大信心呢！而一套全新電子駕駛控制系統，更可以控制懸掛等配備，以求令車子無論On-road抑或係Off-road，都能夠有出色嘅表現。
雖然坊間有傳話呢部xActivity，會係快將推出嘅全新X3車系，不過是真是假仍屬未知之數，但相信成事嘅成數甚高；皆因xActivity本身嘅造型，與X5一樣來得極富肌肉感。不過，最特別都係部車並無B柱及C柱設計，除令造型望落更有活力感外，而且佢重用上Frame-structureconvertible嘅車身設計，車頂可完全開啟之餘，而且重無損車子本身嘅穩紮性㖭！