郭富城、徐子淇同蔣怡噚日去赤柱出席「迪士尼奇幻舞台開幕典禮」。以「愛心動感之星」身份出席嘅城城同一班小朋友上馬車時，隻馬拉極都唔肯埋位，只喺場內踱嚟踱去，重驚到「瀨屎」，最後要由兩個工作人員頂上拉車，由馬車變成人力車，都幾搞笑！
城城事後話：「隻馬發緊脾氣，情緒唔穩定，為安全計咁都啱。我好鍾意馬，最深刻印象就係有年去南美洲度假，喺牧場騎住馬行去沙灘，嗰時冇馬鞍，我着泳褲騎馬，重同馬一齊落水。」問城城冇馬鞍重着泳褲，重要部位咪好痛？「冇，又唔係跑馬，慢慢行啫。」
對於有歌手咪嘴，城城就話：「我最討厭就係喺concert咪嘴，唔唱live，我咁耐都未試過。」唔知被揭發演唱會唱快歌咪嘴嘅陳慧琳，聽到有乜嘢感想呢？
葉璇前晚喺九龍灣出席《歡樂滿東華2002》頒獎晚會，大會為答謝演出《東華》嘅藝人，所以頒獎畀佢哋。
葉璇話：「我第一年演出《東華》，公司叫我嚟呢個晚會，又有獎攞都好好。今年新年同聖誕都會喺工作中度過，我荷包進帳六位數字，所以都考慮買番層樓。」
任賢齊同杜德偉前晚去中環麗嘉酒店出席「滾石十週年AnnualDinner」，任賢齊嘅一班歌迷喺活動上重捧住蛋糕，要任賢齊為一位當日生日嘅歌迷慶祝，氣氛相當熱鬧。另外，滾石亦宣布出年會搞五個音樂會，包括黃品源演唱會同滾石十周年音樂會等。
黎燕珊同一對仔女前晚喺中環欣賞音樂劇《超人阿四》。黎燕珊聽日就會拍皇室纖形嘅廣告，重會着三點式。黎燕珊話：「呢個都算係大膽嘅嘗試，自己一直都有工作，冇乜時間，不過纖體公司今次安排咗營養師幫我設計餐單。」
黎燕珊減肥成功，要買過晒啲衫，佢話：「我以前個胸係大包，跟住係叉燒包，𠵱家係雞包仔。」
岑建勳夫婦同樂蓓等，前晚去沙田出席「天地不容VS天地動容生命反思佈道會」。樂蓓話自己信咗基督教年幾，佢話：「有次我病咗，患咗腹膜炎，醫生都話好嚴重，結果就出現奇迹。」而岑建勳就話：「我拍嘅戲一定要個女都可以睇嘅，唔係多多錢都唔拍，自己個女都唔睇得，咁人哋個女又點可以入場睇。」