積金局前行政總裁許仕仁自從離開政壇是非地，專心做馬會董事之後，果然賭運亨通。冇幾耐之前佢先至拉過頭馬，噚日佢隻馬「有聲有色」喺沙田出賽第七場，同俞宗怡、尤曾家麗、劉吳惠蘭等成班高官以新秀團體名義合夥擁有嘅「勝任愉快」同場競技，結果贏錢兼贏面。
肥佬許賽後話邊隻馬贏都冇所謂，佢同「勝任愉快」班馬主係舊同事兼老友，𠵱家一Q返嚟而且有近百三元派彩，真係皆大歡喜。
賽前有朋友問許仕仁攞料，佢都提供「勝任愉快」，因為無論馬匹血統同狀態都好過「有聲有色」，佢話愛駒能贏純粹靠運氣，認真謙虛。賽前佢都驚騎師薛寶力喺第二場墮馬後，再騎佢隻馬會有啲唔吉利，好彩許太𠱁佢話薛寶力繼續頂硬上，應該為咗贏「有聲有色」，果然俾許太講中。
今次「有聲有色」再贏一仗，又執多近四萬元獎金，𠵱家已經累積咗過百萬元獎金。
（圖）許仕仁（右）隻馬「有聲有色」再贏，梗係多得食力簡訓練得好。
傳真︰2623-9278
電郵︰