今日輪到支持二十三條立法嘅人士搞大遊行，睇吓有冇六萬人上街，照計以工聯會嘅號召力，中聯辦全力支持，今日嘅支持大遊行，應有相當聲勢，各位支持特首，支持梁愛詩、葉劉淑儀嘅，不妨飲完茶就去維園助威。
前日碰到商會人士，問佢會唔會去遊行，佢話：「照我所知，香港總商會就未必有人參加，好多老細都有好節目，去外國滑雪賞雪過聖誕。」咁翁以登博士上校總裁呢？
商會人士話：「你哋唔好玩佢啦，佢係打工仔，總商會董事會通過乜議案，佢就要執行，你估係麥理覺咩。」麥理覺（JimmyMcGregor）當年係總商會總裁，唔聽董事會話，身為總裁去參加功能團體競選，竟然贏咗，啲董事為之火滾，所以請英國將軍Christie（准將）來接替，將軍退休後，再請美國軍人翁以登上校來港做總裁，有此背景，翁以登梗係聽晒上頭話啦，何況佢從軍多年，做到上校咁巴閉，好知道服從命令，在上司面前一定要講YesSir，點敢反駁！
翁以登會唔會參加遊行呢？商會人士話，「好似已經放大假，返美國過聖誕咯，聖誕節真係來得及時，bailout唔少富豪老闆，免得佢哋拋頭去露面，吸引電視攝影機。呢次商界人士之中，李國寶一士諤諤，起碼夠膽公開講出心中情，不愧為真漢子。大編輯話：「我哋曾經當佢係baby咁追新聞，實在慚愧，同只顧商業利益嘅人相比，寶哥哥直情係大丈夫！」