上個禮拜個市雖然好似已經企定，啲藍籌開始有番成交，不過班經紀朋友叫千祈唔好太安心，皆因班美國佬要打伊拉克嘅居心已經好明顯，有朋友話當過咗年之後，就係最好嘅開戰時間，到時美股又會腳軟，要執平貨到時至係時候。不過講真，𠵱家個市咁牛皮，想搵多個人買吓貨都幾難，加埋又係要交稅嘅時候，相信會有唔少人沽貨交稅，即係話個市喺過年後都未必可以好番。
年底前通常大戶都會停手，不過有部份公司由於喺年底重有好消息公布，搞到部份大戶無得提早收爐，好似隻科聯系統（046）咁，喺上個禮拜嘅走勢就幾平穩。
聽講佢哋將會有新嘢推出街，而且已經拉到幾個大客，有人更話佢哋實行靠呢一鋪光耀門楣。就上個星期嚟睇，唔知係唔係班春江鴨聽到消息，已經有幾條線喺個市度吸緊貨，雖然個市唔係好就，而且成交額唔夠大，不過聽聞今鋪嘅爆炸力唔會細，甚至有機見番兩蚊水位，各位不妨留意吓隻股嘅表現。
喺個市冇喱炒氣下，有部份資金開始留意番啲高息股同埋工業股，貪佢哋夠穩陣，好似隻做工業製品生意嘅立信工業（641）咁，唔聲唔聲上半年就賺咗6900萬，盈利升咗八成五，呢啲唔係好郁但質素唔錯嘅股仔，先係班芬佬嘅至愛。
由於隻股成日都有特別股息派，所以部份長線基金都忍唔住手，就好似上個星期咁，一公布咗會發特別股息，又吸引多一批新資金。聽講管理層透露，話今年重會有特別股息派發，各位好息之徒不妨留意一下。
伏勝