八方噚日去文華酒店參加麗新系股東會，其中一項議程，係由麗新發展股東投票表決出售亞洲電視股權。股東會後，有電視台記者追問麗展小股東係咪贊成賣亞視，嗰位本來已經滿肚怨氣嘅股東即時撻着：「贊成！亞視早賣早着啦。正一劏豬櫈，我買咁多隻股票，呢一隻（麗展）輸得我最多。」唔知係咪見小股東喺傳媒面前吐苦水，即時有酒店員工捧出一大籃麵包（原本只提供飲品）畀股東享用，塞住佢哋把口。
其實八方年年都去麗新嘅股東會，舊時股東會都喺未拆嘅富麗華酒店開，雖然唔似超人李嘉誠喺紅磡海逸酒店大排筵席，但都算冇待薄小股東。不過今時唔同往日，麗展債台高築，林伯又話咁多債都理唔掂，連對小股東嘅態度都唔同晒。
（圖）林建名親自主持麗新股東會，但係班小股民一樣好勞氣。
傳真︰2623-9278
電郵︰