又到聖誕喇，今個聖誕八方好唔得閒，因為大把好戲等住要睇，除咗全城大熱嘅《無間道》同《英雄》，吳君如主演嘅喜劇《金雞》都好有睇頭，單係睇套戲嘅宣傳照都笑餐死，尤其係女主角「阿金」喺人群中同董特首熱情握手嗰張。
張相係由《金雞》監製陳可辛構思、《明報周刊》設計嘅，呢個場面並冇出現喺套戲度，不過特首就真係有份「演出」《金雞》，因為電影剪咗一段特首演講嘅片段。
陳可辛話，張相同圖片都冇問准過特首，事關董生係公眾人物，冇咁嘅需要，何況張相又冇醜化或者嘲笑嘅成份。報章廣告上嘅設計圖片加咗句口號：「只要肯努力！一定搵到食！──2002阿金為特首吹吹氣」《金雞》借咗民望長期偏低嘅特首過橋宣傳，陳可辛話唔驚有反效果。佢重好似好抽離咁話：「特首都係香港市民嘅一分子啫！」
無論市民怨唔怨特首都好，陳可辛期望觀眾睇完《金雞》都會感到人生有希望，冇晒怨氣。
點都好啦！又快到普天同慶嘅聖誕節，老董同董太噚日喺禮賓府同班小朋友聯歡，大家暫且放下煩惱happy吓。
（圖）特首伉儷喺禮賓府同小朋友一齊玩，但係表情點解咁Cool嘅？ 張志華攝
傳真︰2623-9278
電郵︰