與電腦J到馬會飲茶，問佢最近有何動態。電腦J話：「第一就係追數。我公司曾為某報館做電腦版顧問，但對方遲遲唔找數。後來有一位老友教我搵律師出信追數，每封信收五百蚊。哈，呢招果然掂，出完信之後，對方找咗一部份數。睇怕以後唔慳得呢五百蚊律師費。」
「第二就係跟客走，頻頻去東莞同澳門睇廠同寫字樓。」去東莞，我明白，東莞乃輕工業之都，世界聞名，睇廠唔去唔得，但點解要去澳門呢？電腦J話：「唔講唔知，原來澳門靜靜雞搞離岸營運中心，去澳門設廠或開支援辦事處（back-upoffice），可以免稅，兼夾租金平，人工平，冇MPF，成本與香港相比，慳番好多！我有幾個客已經搬咗back-upoffice過澳門，佢哋都好滿意，以後陸續有客搬過去。唉，香港點搞呀？」
搬過澳門，除咗成本之外，重有二十四小時通關，包唔會有「塞車」、「塞關」嘅煩擾，而且澳門生活習慣飲食與香港非常接近，點都好過搬上去廣州咁遠！聽電腦J咁講，何厚鏵靜靜起革命，只做不說，只靠口碑，就扯走咗一啲本應喺觀塘辦公嘅公司，為澳門創造就業，唔怪得江主席、朱總理對鏵哥有讚冇彈。咁樣搞落去，港珠澳大橋將大珠三角連為一體之後，澳門一個唔覺意竟成為珠三角營運中心，梁錦松司長嘅大計豈非落空？董特首有乜辦法應付何特首呢？