今時今日香港人對卡拉OK嘅熱衷程度，已經冇當初咁誇張，不過日本人依然愛到發燒，啲唱K新產品真係先進到你都唔信。
好似兩大卡拉OK用品公司KaraokeStation同e-kara，最近都推出咗萬能卡拉OK咪，只要每個月換張新卡插入個咪度，駁埋部電視或者CD機，就可以唱最update嘅歌仔。日本人視之為一件偉大發明，重分別請嚟兩大當紅偶像上戶彩同Morning娘做代言人谷行佢。
素來以人多勢眾大殺四方嘅Morning娘，喺e-kara嘅廣告入面扮白雪精靈，柴娃娃又唱又跳，單係個勢已經贏晒彩妹，咁彩妹有乜計呢？佢喺KaraokeStation嘅廣告入面一人分飾兩角，首先搵幾個姊妹一齊唱K搞吓熱鬧場面，然後又一個人瞓喺梳化扮cool！其實計我羅拉話，Morning娘同彩妹嘅fans，都係最鍾意唱K嗰班人，廣告商揀佢哋實賺梗啦！