楊思琦、劉松仁、楊怡、邵美琪同黃宗澤，噚日喺將軍澳電視城宣傳無綫新劇《英雄、刀、少年》。
劇裏面有好多武打場面，所以幾位主角一早做好準備工夫。松仔同思琦噚日重即場獻技，表演耍劍。馮仁昭見到松仔耍劍時功架十足，但嬌滴滴嘅思琦雖然姿勢似模似樣，但劍法一啲都唔純熟。
思琦喺劇裏面鍾意咗年紀大佢好多嘅松仔，重向松仔表白，不過最終被拒絕。
現實生活中思琦都有好多緋聞，不過佢就話：「我未試過鍾意咁大年紀嘅男人，亦唔會咁主動，都係等人追多。」相反松仔拍咗咁耐戲，都好少有緋聞傳出，松仔竟然話：「冇人吼我，連唔靚嘅女仔都唔肯行埋嚟。」
羅慧娟最近為無綫拍資訊節目《天賜良源》，重跟攝製隊四出拍外景。羅慧娟早排就去咗廣西壯族自治區，重着上瑤族民族服裝。
羅慧娟噚日喺電話中話：「瑤族女子針黹技藝了得，佢哋平時着嘅衫都係自己親手做。」羅慧娟重話佢哋會賣自己嘅製成品，價錢二百至四百蚊人民幣不等。
伊能靜下嫁庾澄慶後，重生埋仔。佢最近喺台灣擔任奶樽代言人，早排舉行記者會時，伊能靜着住性感上衣，酥胸半露。
伊能靜笑笑口話老公睇到，都問佢點解賣奶樽廣告要咁性感。佢又爆老公鍾意飲奶，開奶粉畀仔仔飲時，有時啲奶沖得唔夠熱，變成一塊塊時，老公就將奶飲晒，費事嘥喎！
蓋鳴暉噚日喺電視城為無綫電視劇《金牌冰人》試造型，經常反串做男角嘅蓋鳴暉，今次做番女人，不過佢對自己着女裝衫就唔係好慣。
蓋鳴暉話：「女裝都OK啦，雖然唔係好美豔，但都似個女人囉，都幾得意，初初都唔係好慣，好彩以前學戲都學過吓女仔點行路。」
蕭正楠噚日喺港台接受訪問，講到麥浚龍（Juno）係新人當中走勢最勁嘅一個，唔知蕭正楠有乜嘢感覺，佢話：「恭喜佢，但冇乜感覺。」蕭正楠有感而發話：「我以前講嘢會包裝過先講，但以後講嘢會真啲，怕唔怕得罪人？小唔小心都會俾人誤解，總之係啱嘅嘢就會講。」