老董一聲令下，煲呔哪敢不從？煲呔曾（曾蔭權）佢老哥雖然一早約晒啲屋企人星期日做冬，但都要上京一次，務求同內地就二十四小時通關等大大小小嘅問題達成最多共識，等老董一月份嗰份施政報告可以寫得好好睇睇。
所謂冬大過年，但係下星期一大清早又要同港澳辦官員開會，煲呔只好盡量相就，一於提早晏晝做冬，然後坐夜晚七點機上京。咁都啱數嘅，朝冬晚年，中午做冬甚平常，𠵱家為咗份工，好多家庭都提前做節啦，邊有咁好命做正日吖？
講開又講，香港人做冬咁嘅大節日，一日可以劏成二十六萬隻雞，比平日多成倍半有多，咁好生意，班雞販就的確應該支持多洗一日雞籠啦。
傳真︰2623-9278
電郵︰