羅嘉良日前跟神秘女子涉醉酒駕駛，在發生意外後不顧而去，有傳該名女子是嘉良緋聞女友宣萱，但兩人均否認。事件發生後，嘉良的太太方敏宜一直保持緘默，但昨日卻現身力撐老公，表示夫婦關係要好。
羅嘉良早前因涉嫌醉酒駕駛，發生車禍後與同車女子不顧而去。由於該女子之身份一直撲朔迷離，一時被傳是宣萱、一時又被傳是佘詩曼，令事件更加複雜，日前更有周刊報道羅嘉良當晚與宣萱夜蒲，而懶理兒子急症入院。
嘉良昨日在無綫電視城召開記者會，而太太方敏宜終打破緘默，驅車到場接載嘉良離去，以行動闢謠，力證夫妻關係良好。
羅嘉良昨日在無綫經理人蕭笑鳴陪同下出現，他表示整件事正由警方處理，對於周刊的報道，他表示：「我今日睇咗，覺得啲報道好失實，所以我覺得有澄清嘅必要，因為今次佢哋已經傷害到我嘅屋企人，佢哋已經唔係第一次咁樣，首先我根本就唔係喺佢哋所講嘅餐廳食飯，同埋我無帶紅酒，嗰個女仔都唔係宣萱，佢哋話有訪問我阿媽，但我阿媽話佢只係接過另外一間傳媒嘅電話，根本佢哋就冇打過電話嚟，呢件事我交咗畀律師處理。」
對於指嘉良懶理兒子急症入院，他則氣憤表示：「當晚我係同朋友食飯，之後接到我老婆打電話話個仔嘔得好犀利，咁我就趕去浸會醫院，之後太太話冇事，咁我就返屋企，可能我好擔心個仔，所以就發生咗意外，我好抱歉好內疚。」
至於同車女子的身份，嘉良依然保持神秘，他笑言：「你唔覺如果係男性會重敏感咩！其實要講嘅都講晒，成件事已交畀警方處理。我有必要保護我朋友嘅私隱。」
向來甚少開腔的羅太方敏宜，昨日亦現身力撐嘉良，她甫下車即與嘉良大方合照，方敏宜說：「因為落雨唔方便畀佢揸車，其實我係完全信任我先生，我哋之間係冇第三者，佢所講嘅我完全信任。」嘉良經常傳出緋聞，她表示：「我對我哋嘅婚姻好滿意。」
採訪、攝影：王崇穎