與謝霆鋒分手後的張栢芝，近日頻頻出動掃貨。前晚栢芝出席新片煞科宴時，便刻意戴上以四十萬元購入的三卡心形鑽戒騷哥利，席間栢芝一時興起，更當眾踢爆劉德華拍戲期間曾向她施以胸襲，令華仔尷尬不已。
張栢芝前晚往尖沙嘴「新野卡拉OK」，出席電影《無間道》慶功和《老鼠愛上貓》煞科宴。心情甚佳的她滿場飛，十分風騷，除向記者展示她近日以四十萬元購入的三卡心形鑽戒外，又將現場布置用的聖誕波掛在自己的頸鏈上，甚至一時興起當眾踼爆劉德華與她合作《老鼠愛上貓》時曾胸襲她，令華仔十分尷尬。
今日先至攞貨，三卡心形，新鮮出爐！
前晚栢芝本表示不欲接受訪問，及後謂若只談電影的話便沒問題，然後便滔滔不絕地向記者講述她早前在北京拍戲的種種苦與樂。栢芝說：「當地天氣乾燥，拍戲雖然好辛苦，但就拍得好開心，我重俾華仔胸襲㖭！嗰場戲係講我反串做男仔，華仔有個動作係用手拍我心口，但劇本交代係掂唔到，點知華仔拍嘅時候收唔到掣，不過我都冇尷尬，因為我當自己係男仔，當時華仔亦都好似若無其事咁繼續拍戲。講真，我咁大個女都係第一次俾人胸襲咋！」
栢芝說話期間，不時把玩戴在手上的巨型心形鑽戒，當記者大讚其鑽戒十分耀眼時，栢芝即興奮地笑說：「係呀！我今日先至攞貨，三卡心形，成四十萬㗎！我見新鮮出爐，咪戴畀大家睇吓！不過，呢樣嘢唔係我送畀自己最貴嘅嘢，最貴係層樓！」栢芝又表示自己的第一粒鑽石，是其大姊在她十一、十二歲時送贈的，雖然那顆鑽石細到大風啲都吹得起，但她仍將鑽石鎖在保險箱內，留待將來結婚時戴上。
大家睇睇劇情先，唔好咁快穿橋。
而栢芝除在記者面前踢爆華仔胸襲她外，其後在台上又當眾取笑華仔道：「我拍戲嘅時候俾一個靚仔胸襲，佢咪係劉德華囉！」大會司儀即追問華仔感覺如何，華仔則一味尷尬地笑說：「好嘢！但係我要講嘅就係，劇情唔好披露出嚟！」
事後記者再就胸襲事件追問華仔感受時，面露尷尬之色的華仔刻意迴避說：「今日唔好講《老鼠愛上貓》嘅嘢，大家睇睇劇情先，唔好咁快穿橋。」華仔又表示《無間道》是他拍戲以來，參與最少的一齣電影，因為當時他有官司在身，但在此情況下仍能有此佳績，實在非常難得。
自己唔適合做老闆，呢樣嘢真係講命！
華仔慨歎地說：「拍呢部戲期間，身邊有人經常輔導我，話叫我唔使擔心，話唔使理呢啲人，鼓勵我拍啲好戲畀佢睇重好，令我認識到乜嘢叫做友誼，呢部係一部友誼電影，令我明白到友誼重大，吐氣揚眉。原本呢部戲係我做老闆，但因為官司開唔成，不過，我覺得唔係我可惜，係天幕可惜就真！自己唔適合做老闆，呢樣嘢真係講命！」
採訪：魯萍、何永寧
攝影：仇志德