港股噚日先跌後升，波幅達153點，收報9628，升70點，但成交就降至48.43億元。港股收市後，美股標普期指曾升9點，市場似乎睇好美股周五晚走勢，不過戰爭陰影未除，造好都係小心啲。
Cookie話，市場傳出有歐資基金入市掃電訊股，配合歐洲電訊股年尾櫥窗粉飾活動。細細粒容易食嘅電盈（008）急升6.6%，收報1.29元，表現比其他電訊股為佳。若歐資掃電訊股傳聞屬實，相信電盈仍有排升。此外，市場近日頻頻傳出李澤楷會回購大東手上14%股權，據聞唔少大行報告都作出類似揣測，唱到真嘅一樣，睇嚟空穴來風，未必無因。
遼寧省政府終提出以每股0.10元，向大股東中國金融教育發展基金收購華晨（1114）39.45%股權，並提出技術性全購，收購價雖較市價低逾90%，但呢次收購純粹是省政府將華晨收歸國有的舉動，同時亦反映股權紛爭告一段落，華晨不利因素消除得七七八八，大行開始重新部署投資策略，據聞大摩調高華晨目標價至2.90元，以噚日收市價1.43元計，有1倍上升空間。
威華達（622）宣布2供3，由於供股價為2仙，較前收市價折讓60%，尋日復牌即急挫44%，收報2.8仙，但成交只有37.45萬元。聽聞今次係百仕達（1168）入股29.99%後，進一步增持嘅計劃，因為百仕達將悉數包銷供股股份，如果少人供股，百仕達在威華達之持股量將增至介乎59.28%至72%之間，同時又可避免提出全購。
換言之，威華達股價跌得愈深，供股吸引力愈細，百仕達所包銷嘅股份便愈多，可以增持更多威華達股份。據黑客話，若百仕達增持計劃成功，威華達可能會有一連串動作跟尾，不過一切都要等供完股至算。
阿虎