近日聽得多「社會分化」這個形容詞，各界對它似乎憂多於喜，每次提及，都是慼慼然。
社會fun化，有乜唔好呢又？fun化，不是僵化，繽紛風趣，何慮之有。正所謂，合久必分，分拆上市，應該更利鑽營。分頭搵食肯定比苟合拖拉積極進取，沒有和稀泥。
社會只是分化，不是火化，未去到同歸於盡、玉石俱焚的火葬階段。這個時候不會，將來也不可能會。打算把社會分化無限上綱、描繪成白色恐怖的專論，不會有市場。火葬場的生意，有冇廿三條，都係咁上下，無謂作大篤數，火上加油。
有評論指出，社會為廿三條分化成兩大陣營，似黑社會晒冷。
黑社會話題電影拍到似層層，難怪有人信以為真，對號入座。現實中，社會各階層討論廿三條時，絕對無模仿黑幫作業。以反對廿三條賤視民意、倉卒上馬的市民做例子，他們站出來表達意見，自發上街，跟黑幫吹雞，動員黑超、黑衫褲晒馬式聚眾行事的作風，分別大異。遊行反對廿三條的隊伍中，不少還是一家幾口，家中老中青三代同來，團結得像過節。
社會分化，不是分屍、分贓，問題不大。睇開就睇化。不必上頭。